حقیقی انسانی جلدسے روبوٹس کے چہرے تیار کرلیے گئے

سائنس اینڈٹیکنالوجی کی دنیا میں انقلاب برپا۔  سائنسدانوں نے حقیقی انسانی جلدسے روبوٹس کے چہرے تیار کرلیے۔

سائنسدانوں کی جانب سے کافی عرصہ سے روبوٹس کو انسانوں جیسا بنانے کی کوشش کی جا رہی ہے،مگر روبوٹس پر انسانوں جیسی حقیقی جلد کا استعمال کیا جائے گا، اس کا کسی نے تصور بھی نہیں کیا ہوگا۔ جرنل سیل رپورٹس فزیکل سائنس میں شائع ایک تحقیق میں اس حوالے سے بتایا گیا ہے کہ جاپانی سائنسدانوں نے انسانی جلدی خلیات کو لیکر روبوٹس کیلئے جلد تیار کر لی ہے۔

اس تحقیق کا مقصد روبوٹس کے چہروں پر انسانوں جیسی مسکراہٹ اور تاثرات کو اجاگر کرنا ہے۔ٹوکیو یونیورسٹی کے ماہرین کے تیار کردہ روبوٹس انسانوں جیسے تو نظر نہیں آتے، مگر سائنسدانوں کے مطابق انہوں نے حقیقی نظر آنیوالے روبوٹس کی تیاری میں پیشرفت کی ہے۔

سائنسدانوں کے مطابق یہ ایسے روبوٹس ہوں گے، جن کی جلد خودکار طور پر اپنی مرمت کرنے کی صلاحیت رکھتی ہوگی۔ اس مقصد کیلئےانہوں نے لیبارٹری میں انسانی زندہ خلیات کو استعمال کرکے مصنوعی جلد تیار کی، جو نا صرف بہت زیادہ نرم ہے، بلکہ وہ کٹ جانے پر اپنی مرمت کرنے کی صلاحیت بھی رکھتی ہے۔

محققین کے مطابق اس ٹیکنالوجی کو حقیقی شکل دینے میں چند سال لگ سکتے ہیں، کیونکہ ابھی روبوٹس کے چہروں پر انسانوں جیسے تاثرات ابھارنا کسی چیلنج سے کم نہیں۔ اہم بات یہ ہے کہ سائنسدانوں کا کہناہے کہ اس تحقیقی کام کو پلاسٹک سرجری اور دیگر مقاصد کیلئے بھی استعمال کیا جاسکے گا۔