خواجہ آصف کیخلاف ہتکِ عزت کیس: عدالت نے جلد سماعت کی درخواست منظور کر لی

اسلام آبادہائیکورٹ نےشوکت خانم ہسپتال سے متعلق الزامات پر بانی پی ٹی آئی کی جانب سے خواجہ محمد آصف کے خلاف 10 ارب روپے ہرجانے کے دعوے کی درخواست جلدسماعت کےلئے منظورکرلی۔

شوکت خانم ہسپتال سے متعلق الزامات پر10 ارب روپے ہرجانے کے دعوے کی سماعت سیشن کورٹ میں جاری ہے۔
سیشن کورٹ میں جاری کارروائی کے دوران بانی پی ٹی آئی کے اعتراضات مسترد کیے جانے کے خلاف دائر اپیل پر عدالت نے جلد سماعت کے لیے دائر متفرق درخواست منظور کر لی۔
عدالت نے ہدایت کی کہ کیس کو موسمِ سرما کی عدالتی تعطیلات کے بعد دوسرے ہفتے میں مقرر کیا جائے۔
درخواست گزار کے وکیل عمر ضیاء الدین ایڈووکیٹ عدالت میں پیش ہوئے۔
چیف جسٹس سرفراز ڈوگر نے جلد سماعت سے متعلق متفرق درخواست پر سماعت کی۔
واضح رہے کہ خواجہ آصف نے ایک پریس کانفرنس کے دوران شوکت خانم کے فنڈز میں مبینہ منی لانڈرنگ اور غلط استعمال کے الزامات عائد کیے تھے۔
بانی پی ٹی آئی نے ان الزامات کے خلاف 2012 میں خواجہ محمد آصف کے خلاف 10 ارب روپے ہرجانے کا ہتکِ عزت کا دعویٰ دائر کیا تھا۔
عدالت نے مرکزی کیس عدالتی تعطیلات کے بعد مقرر کرنے کی ہدایت دیتے ہوئے سماعت ملتوی کر دی۔