خیبرپختونخوا حکومت کے سیاحت کے فروغ کیلئے بڑے اعلانات

سیاحت کے فروغ کیلئے اہم اقدامات، خیبرپختونخوا حکومت کے بڑے اعلانات،کےپی حکومت نے ٹورزم پولیس کے اہلکاروں کو مستقل کرنے، ان کی تنخواہوں میں بڑا اضافہ سمیت سیاحتی مقامات کی ترقی کیلئے منصوبے شروع کرنے کا فیصلہ کر لیا۔
وزیراعلیٰ خیبرپختونخوا کی زیر صدارت خیبر پختونخوا کلچر اینڈ ٹوارزم اتھارٹی کے بورڈ آف ڈائریکٹرز کا اجلاس منعقد ہوا، جس میں صوبائی کابینہ کے اراکین، ایڈیشنل چیف سیکریٹری پلاننگ اور ڈویلپمنٹ کے علاوہ دیگر بورڈ اراکین نے شرکت کی۔
اجلاس میں مختلف ایجنڈا آئٹمز پرغور و خوض کے بعد اہم فیصلے کیے گئے اور وزیر اعلیٰ خیبرپختونخوا نے ٹورزم پولیس کے اہلکاروں کو مستقل کرنے کا اعلان کیا۔بورڈ اجلاس میں ٹورزم پولیس کے اہلکاروں کی ماہانہ تنخواہ 36 ہزار روپے سے بڑھا کر 45 ہزار روپے کرنے کی منظوری دی گئی اور ٹوارزم پولیس کو مزید مستحکم کرنےکیلئے مزید ہیوی بائیکس اور کمیونیکیشن گیجٹس بھی فراہم کرنے کا فیصلہ کیا گیا۔
اس موقع پر محکمہ سیاحت کے حکام کو مزید سیاحتی مقامات دریافت کرنے کیلئے اقدامات کی ہدایت بھی کی گئی اور کہا گیا کہ اگلے مالی سال کے بجٹ میں کم از کم چار نئے سیاحتی مقامات کو ڈیولپ کرنے کے منصوبے شامل کیے جائیں۔
اجلاس کو بتایا گیا کہ گزشتہ سیزن میں ڈیڑھ کروڑ ملکی اور غیر ملکی سیاحوں نے خیبر پختونخوا کا رخ کیا، سیاحوں کی بڑھتی ہوئی تعداد کے پیش نظر صوبے میں نئے سیاحتی مقامات دریافت کرنے کی ضرورت ہے۔
اجلاس میں ٹھنڈیانی انٹیگریٹڈ ٹوارزم زون کے ماسٹر پلان میں ضروری ترامیم کر کے اشتہار جاری کرنے کا بھی اعلان کیا گیا اور بتایا گیا کہ سیاحت کا شعبہ حکومت ِ خیبر پختونخوا کے ترجیحی شعبوں میں شامل ہے۔