دفعہ 144کی خلاف ورزی:پی ٹی آئی رہنمامہربانوگرفتار

پنجاب میں دفعہ 144کی خلاف ورزی پرپولیس نے پی ٹی آئی کارکنوں کی گرفتاریاں شروع کردیں۔سابق وزیرخارجہ شاہ محمود قریشی کی صاحبزادی مہربانو قریشی کو بھی گرفتارکرلیاگیا۔
تحریک انصاف کی جانب سے انتخابات کو ایک سال مکمل ہونے پرآج یوم سیاہ منایاجارہاہے۔چیف آرگنائزرعالیہ حمزہ نے کارکنوں کو اپنے اپنے علاقوں میں احتجاجی ریلیاں نکالنے کی ہدایت کی تھی۔مہربانوقریشی کو قادرپوراں کے علاقے مخدوم رشید سے گرفتار کیاگیا۔مہربانوقریشی کے ہمراہ ساتھیوں مہردلیرخان،مخدوم زاہد بہارہاشمی کو بھی گرفتار کرلیاگیا۔
واضح رہے کہ پنجاب حکومت نے صوبے بھر میں دفعہ 144 نافذ کی ہے، ہر قسم کے جلسے جلوس، دھرنے اور احتجاج پر پابندی لگائی گئی ہے ۔ پنجاب میں ہر قسم کے سیاسی احتجاج، جلسے، جلوس، ریلیوں، دھرنوں اور ایسی تمام سرگرمیوں پر پابندی عائد ہے، دفعہ 144 کے نفاذ کا فیصلہ امن و امان کے قیام، انسانی جانوں اور املاک کے تحفظ کیلئے کیا گیا ہے۔