رمضان کے آخری عشرے میں روضہ رسول ؐ پر حاضری کا شیڈول جاری

مذہبی سیاحت و عبادت کا عروج،رمضان کے آخری عشرے میں روضۂ رسول ؐپر حاضری کا شرف، ریاض الجنہ میں نماز ادا کرنے کا شیڈول جاری کر دیا گیا۔
سعودی عرب میں رمضان کے آخری عشرے میں روضۂ رسول ؐ پر حاضری کی خاطر زائرین کی بڑی تعداد مدینہ منورہ پہنچ گئی۔ دنیا بھر سے آنیوالے زائرین کی کثیر تعداد میں آمد کے باعث مسجد نبوی کی انتظامیہ نے آخری عشرے میں روضۂ اقدس پر حاضری اور ریاض الجنہ میں نماز ادا کرنے کیلئے خصوصی شیڈول جاری کر دیا ہے۔
ادارہ امورِ حرمین شریفین کے جاری کردہ شیڈول کے مطابق مرد نمازیوں کیلئے روضۂ پاک کی زیارت کا آغاز صبح گیارہ بجکر بیس منٹ سے رات 8 بجے تک ہوگا۔مرد زائرین کیلئے دوسرے مرحلے میں رات 11 بجے سے 12 تک اور تیسرا مرحلہ صبح سحری کے قریب 2 سے 5 بجےتک ہوگا۔
اس کے علاوہ خواتین زائرین کیلئے صبح 6 سے 11 بجے تک روضہ رسول ِ کریم ؐپر حاضری اور ریاض الجنہ میں نماز ادا کرنے کیلئے وقت مقرر کیا گیا ہے۔
ادارۂ امورِ حرمین کا مزید کہنا ہے کہ ریاض الجنہ میں نوافل کی ادائیگی کیلئے نسک پورٹل کے ذریعے پیشگی وقت حاصل کرنا ضروری ہے۔ اس کا مقصدرش پر قابو پانا اور زیادہ سے زیادہ زائرین کو نوافل ادا کرنے کی سہولت فراہم کرنا ہے۔
ذہن نشین رہے کہ روضہ رسولؐ کا رقبہ 330 مربع میٹر ہے ،جس میں فی گھنٹہ 800 زائرین کی گنجائش رکھی گئی ہے۔اس طرح اوسطاً ہر زائر کو دس منٹ دستیاب ہوں گے۔