رواں سال مون سون میں معمول سے 23 فیصد زائد بارشیں ریکارڈ

مون سون میں معمول سے 23 فیصد زائد بارشیں ریکارڈ، پری ونٹر بارشوں میں کمی کا امکان ہے۔
محکمہ موسمیات کے مطابق رواں سال مون سون کے دوران ملک بھر میں معمول سے 23 فیصد زائد بارشیں ریکارڈ کی گئیں۔
محکمہ موسمیات کا کہنا ہے کہ پری ونٹر (Pre-Winter) بارشوں میں کمی کا امکان ظاہر کیا گیا ہے اور اس کی بنیادی وجہ موسمی پیٹرن میں تیزی سے آنیوالی تبدیلیاں ہیں، اس سال سردیوں کے آغاز میں بارشیں کم ہوں گی، مگر سردیوں کے اختتام پر زیادہ بارشیں متوقع ہیں۔
محکمہ موسمیات کی طرف سےیہ بھی خدشہ ظاہر کیا ہے کہ گزشتہ سال کی طرح اس سال بھی سردیوں کے دوران برفباری کم ہو سکتی ہے، اگر برفباری کم ہوئی تو اس کا اثر اگلے سال کے مون سون پر پڑے گا اور امکان ہے کہ آئندہ مون سون کی شدت زیادہ ہو۔
محکمہ موسمیات نے اس صورتحال کو موسمیاتی تبدیلیوں کا تسلسل قرار دیا ہے اور کہا ہے کہ موسمی پیٹرن میں تیزی سے تبدیلیاں ملک کے مختلف حصوں میں بارش اور برفباری کے نظام کو متاثر کر رہی ہیں۔