ریلوے نے رواں سال 75ارب روپے کی ریکارڈ آمدن حاصل کرلی

ریل کے مسافروں کیلئے بڑی خوشخبری،پاکستان ریلویز کی ٹرینیں پٹڑی پر چڑھ گئیں۔محکمہ ریلوے نے رواں سال 75ارب روپے کی ریکارڈ آمدن حاصل کرلی ۔
ترجمان ریلوے کے مطابق گزشتہ سال پاکستان ریلویز کو 69 ارب روپے کی آمدن ہوئی تھی ،جبکہ گزشتہ برس کی نسبت رواں سال 6 ارب روپے زیادہ کمائی ہوئی ہے۔
ترجمان کے مطابق رواں سال مال گاڑیوں سے 40 ارب کمائی ہوئی،جبکہ اب تک مسافر ٹرینوں سے آمدن 26 ارب روپے رہی۔اسی طرح لینڈ اور دیگر ذرائع سے 9 ارب روپے حاصل ہوئے ۔
سی ای او ریلوے عامر علی بلوچ کا کہنا ہے کہ ریکارڈ آمدن ریلوے کی درست سمت میں پیشرفت ہے،محکمہ ریلوے مسافروں کو مزید سہولیات اور نظام میں بہتری کیلئے پرعزم ہے۔
ذہن نشین رہے کہ ریل کا سفر اکثرو بیشتر مسافروں کیلئےسستا ہونے کیساتھ رومانوی بھی ہوتا ہے، یہی وجہ ہے کہ بین الاصوبائی اور بین الاضلاعی سفر کیلئے روزانہ ہزاروں مسافرٹرینوں میں سفر کرتے ہیں، جس سے پاکستان ریلویز کو کرایہ کی مد میں خطیر رقم حاصل ہوتی ہے۔