ریلوے کا لاہور تا کراچی گرین لائن کی طرز پر نئی ٹرین چلانے کا عندیہ

ریل کے مسافروں کیلئے خوشخبری ،ریلوے نے لاہور اور کراچی کے درمیان گرین لائن کی طرز پر نئی ٹرین چلانے کا عندیہ دےدیا۔
پاکستان ریلویز کے سی ای او کا کہنا ہے کہ لاہور اور کراچی کے درمیان گرین لائن طرز کی ایک نئی ٹرین چلائی جائے گی اور مرحلہ وار تمام کوچز کو اَپ گریڈ کیا جائے گا۔
چیف ایگزیکٹو آفیسر پاکستان ریلویز عامر علی بلوچ کا مزید کہنا تھا کہ ریلوے کی اولین ترجیح مسافروں کو بہتر سفری سہولیات فراہم کرنا ہے اور خوش آئند بات یہ ہے پاکستان ریلویز کے پاس اب جدید ٹیکنالوجی موجود ہے، جس کی مدد سے مقامی سطح پر نئی کوچز تیار کی جا رہی ہیں، جس کے بعد ریلوے کو بیرون ملک سے کوچز درآمد کرنے کی ضرورت نہیں رہے گی، جس کی ایک مثال یہ ہے کہ پاکستان ریلویز نے بولان ایکسپریس کا آپریشن صرف 45 دنوں کے اندر اپنے وسائل سے بحال کیا، مزید یہ کہ بارشوں سے متاثرہ ریلوے ٹریک اور پل بھی ریلوے اپنے وسائل سے ہی مرمت کر رہا ہے۔
سی ای او پاکستان ریلویز نےٹرینوں میں کھانے پینے کے معیار کو مزید بہتر بنانے اور صفائی کے حوالے سے احکامات جاری کرتے ہوئے کہنا تھا کہ محکمے کا فرض ہے کہ مسافروں کو صاف ستھرا اور آرام دہ ماحول فراہم کرے ۔ اس موقع پر انہوں نے ریل کے مسافروں سے بھی اپیل کی کہ وہ ٹرینوں میں صفائی کا خصوصی خیال رکھیں، تاکہ ٹرین کا سفر خوشگوار اور یادگار ثابت ہو۔