ریڈیو اور ٹی وی کے باکمال فنکار قاضی واجد کو ہمیشہ یاد رکھا جائے گا

باکمال اداکار قاضی واجد کو مداحوں سے بچھڑے7 برس بیت گئے۔ریڈیو اور ٹی وی کے باصلاحیت فنکار قاضی واجد کو ہمیشہ یاد رکھا جائے گا۔
قاضی واجد کا اصل نام قاضی عبدالواجد انصاری تھا۔ وہ 1943 میں لاہور میں پیدا ہوئے اور قیام پاکستان کے بعد اپنے خاندان کے ہمراہ کراچی میں سکونت اختیار کی۔ انہوں نے 10 برس کی عمر میں اپنے کیریئر کا آغاز کیا اور پہلی مرتبہ بچوں کے پروگرام نونہال میں صدا کاری کے جوہر دکھائے۔ وہ 25 برس تک ریڈیو سے منسلک رہے اورانہوں نے اپنی شاندار صداکاری سے سامعین کو اپنے سحر میں جکڑے رکھا۔
60 کی دہائی میں پاکستان ٹیلی ویژن کا آغاز ہوا تو قاضی واجد اس سے منسلک ہو گئے۔ ان کا ٹی وی کیلئے پہلا ڈرامہ ’’ایک ہی راستہ‘‘ تھا۔ 1969 میں مشہور ڈرامہ ’’خدا کی بستی‘‘ شروع ہوا، تو اس میں قاضی واجد کو راجہ کا کردار ملا، جس سے انہیں خوب شہرت ملی۔قاضی واجد نے ٹیلی ویژن پر اَن گنت کردار کیے، تاہم انہیں ’’ دھوپ کنارے، اَن کہی، تنہائیاں، حوا کی بیٹی، خدا کی بستی، چاند گرہن، پل دو پل، تعلیم بالغاں اور انارکلی‘‘ میں یادگار کرداروں کے حوالے سے ہمیشہ یاد رکھا جائے گا۔