زیارت میں برفباری، وادی کی گلیاں اور پہاڑ سفید ہو گئے

بلوچستان کے شہر زیارت میں موسم سرما کی برفباری کے بعد وادی میں سردی کی شدت بڑھ گئی ۔زیارت اور گرد و نواح میں گزشتہ رات ہونیوالی برفباری سے وادی کی گلیاں اور پہاڑ سفید ہو گئے۔
وںتو وادیٔ زیارت یہاں مدفون ایک بزرگ خرواری بابا کی زیارت گاہ سےمنسوب ہے ، تاہم یہ وادی بانیٔ پاکستان قائد اعظم محمد علی جناح کی قیام گاہ زیارت ریذیڈنسی کی وجہ سے بھی مشہور ہے۔وادیٔ زیارت قدرتی جنگلات کے درمیان زگ زیگ راستوں،یہاں واقع پرسکون ریسٹ ہاؤس اور چھوٹے بڑے کوہساروں میں گھری ہوئی ہے۔
یہاں صنوبر کے درختوں سے پھوٹتی خوشبو ، شفاف چشمے اور گنگناتی ہوائیں ملکی و غیر ملکی سیاحوں کو بلاوے دیتی دکھائی دیتی ہیں۔ یہی وجہ ہے کہ وادیٔ زیارت میں برفباری کےآغاز کے بعد شہر قائد کراچی اور بلوچستان کے دور دراز کے علاقوں سے برفباری کے شوقین سیاحوں نے یہاں کا رخ کر نا شروع کر دیا ہے۔