زیتون کے تیل کا بہترین فائدہ دریافت

پاکستان ٹوڈے: زیتون کے تیل کا بہترین فائدہ دریافت۔ زیتون کا تیل انسانی صحت کیلئے انتہائی مفید تصور کیا جاتا ہے اور اب ماہرین نے اس کا ایک اور فائدہ دریافت کیا ہے۔

تفصیلات کے مطابق زیتون کے تیل سے دماغی تنزلی کا باعث بننے والے مرض ڈیمینشیا سے موت کا خطرہ گھٹ جاتا ہے۔ جرنل جاما نیٹ ورک اوپن میں شائع تحقیق میں 92 ہزار سے زائد افراد کو شامل کیا گیا تھا۔ تحقیق کے آغاز میں یہ افراد امراض قلب اور کینسر سے محفوظ تھے۔ناشتے میں اس غذا کا استعمال ہارٹ اٹیک سے تحفظ فراہم کر سکتا ہے۔

تحقیق کے دوران ان افراد کی غذائی عادات کی جانچ پڑتال کی گئی اور یہ دیکھا گیا کہ زیتون کے تیل کے استعمال سے دماغی صحت پر کیا اثرات مرتب ہوتے ہیں۔ان افراد کی صحت کا جائزہ 28 سال تک لیا گیا، جس دوران 4751 افراد ڈیمینشیا سے جڑے مسائل کے باعث انتقال کرگئے۔

تحقیق میں دریافت کیا گیا کہ روزانہ محض آدھا چائے کا چمچ زیتون کا تیل استعمال کرنے سے ڈیمینشیا سے جڑے مسائل سے موت کا خطرہ 28 فیصد تک کم ہو جاتا ہے۔محققین کے مطابق پراسیس چکنائی کی جگہ زیتون کے تیل کا استعمال صحت کیلئے اچھا انتخاب ہے اور جان لیوا ڈیمینشیا کا خطرہ کم کرتا ہے۔

نتائج کی تصدیق کیلئے مزید تحقیق کی ضرورت ہے، مگر شواہد سے عندیہ ملتا ہے کہ زیتون کے تیل کا استعمال انسانی صحت کیلئے بہت مفید ہے۔محققین کے مطابق زیتون کے تیل میں موجود اینٹی اکسائیڈنٹس سے دماغ کو فائدہ ہوتا ہے اور اس سے دل کی صحت بھی بہتر ہوتی ہے۔