سموگ کی شدت میں کمی،ہوٹلز،ریسٹورٹنس کےاوقات کارمیں نرمی

لاہور سمیت پنجاب بھر میں سموگ کی شدت کم ہونے پر ہوٹلز اور ریسٹورنٹس کے اوقات کار میں نرمی کردی گئی۔ محکمہ ماحولیات نے نوٹیفکیشن جاری کر دیا۔
نوٹیفکیشن کےمطابق تمام ہوٹلز، ریسٹورنٹس اور فوڈ آؤٹ لیٹس کو رات 10 بجے تک کھلا رکھنے کی اجازت ہوگی، ہوٹلز اور ریسٹورنٹس میں ڈائن اِن، پارکنگ میں کھانے اور ٹیک اوے کی سہولت رات 10 بجے تک دستیاب ہوگی،ہوم ڈلیوری خدمات پر کسی قسم کی کوئی پابندی نہیں ہوگی۔15 نومبر کے حکم نامے کے تحت عائد پابندیوں میں نظرثانی کی گئی ہے۔
محکمہ ماحولیات کاکہناہےکہ پنجاب میں بارش، ہوا کی رفتار اور سمت میں تبدیلی کے باعث ماحولیاتی کیفیت میں بہتری آئی ہے۔تمام ڈویژنل کمشنرز اور ڈپٹی کمشنرز کو پابندیوں میں نرمی پر عمل درآمد یقینی بنانے کی ہدایت کردی گئی ہے۔