سیاحت کے فروغ میں اے آئی کااہم کردار، بڑی تبدیلی لانے کیلئے تیار

سیاحت کے فروغ میں مصنوعی ذہانت کا اہم کردار، اے آئی سیر و سیاحت کے شعبے میں بڑی تبدیلی لانے کیلئے تیار،آرٹی فیشل انٹیلی جینس ٹیکنالوجی نے شعبۂ سیاحت میں انقلاب برپا کر دیا۔
بین الاقوامی میڈیا رپورٹ کے مطابق روایتی ٹریول ایجنٹس کے کردار کو چیلنج کرتے ہوئے اے آئی سے تیار کردہ ٹولز کی مدد سے بہت کم وقت میں سیاحوں کیلئے تعطیلات میں سیاحت کے اچھے پیکیج تیار کرنے کا رجحان بڑھتا جا رہا ہے۔
رپورٹ میں بتایا گیا ہے کہ دنیا کی کئی ٹریول ایجنسیاں سیاحت کے شعبے میں ترقی کیلئے تیزی سے مصنوعی ذہانت کو اپنا رہی ہیں۔اس حوالے سے نیو یارک یونیورسٹی میں ٹریول سیکٹر کے ماہر جوکا لیتاماکی کا کہنا ہے کہ اے آئی بکنگ کو آسان بنانے کے علاوہ اور بھی بہت کچھ کر رہی ہے، اس کی مدد سے سفر و سیاحت کے شیڈول میں تبدیلی کروانا بھی آسان ہو گیا ہے۔
ان کا کہنا ہے کہ کسی بھی قسم کی تبدیلی کیلئے اب سیاحوں کو کسی کو کال کرنے کی ضرورت نہیں ، بس صرف سسٹم میں اپنا سفر نامہ اپ ڈیٹ کر نا ہو گا۔جوکا لیتاماکی کے بقول اب، جبکہ چھوٹی ٹریول ایجنسیاں مصنوعی ذہانت کو اپنا رہی ہیں تو مشہور ٹریول پلیٹ فارمز بھی تکنیکی مہارت کے ذریعے دوبارہ غلبہ حاصل کر سکتے ہیں، کیونکہ انہیں کسٹمر بیس مل گیا ہے۔
ان کا مزید کہنا ہے کہ جہاں تک روایتی ٹریول ایجنٹس کے مستقبل کی بات ہے تو وہ عیش و عشرت میں گزر سکتا ہے ،کیونکہ انتہائی دولت مند لوگ اب بھی انسانی ایجنٹس پر ہی اعتماد کرتے ہیں۔