شعبہ تعلیم میں انقلاب :ارلی چائلڈ ایجو کیشن کے مزید 50 سینٹر بنانے کا فیصلہ

طلبا وطالبات کیلئے خوشخبری، ارلی چائلڈ ایجو کیشن کے مزید 50 سینٹر بنانے کا فیصلہ کرلیاگیا۔سیکرٹری تعلیم محی الدین وانی کا کہنا ہے کہ ارلی چائلڈ ایجوکیشن کے مزید 50 سینٹر بنائیں گے۔
قومی اسمبلی کی قائمہ کمیٹی برائے تعلیم کے اجلاس میں سیکرٹری تعلیم محی الدین وانی نے مجوزہ بجٹ 26-2025سے متعلق بریفنگ دی۔
سیکرٹری تعلیم کا کہنا تھا کہ اگلے بجٹ میں 60 لیبز کی تیاری کا منصوبہ شامل کیا گیا ہے، 30 لیبز دیہاتی علاقوں کے سکولوں میں بنیں گی۔
ان کا کہنا تھا کہ ارلی چائلڈ ایجوکیشن کے مزید 50 سینٹر بنائیں گے، 80 اداروں میں سکل لیب بنانے کیلئے 300 ملین روپے تجویز کیے ہیں۔بریفنگ میں بتایا گیا کہ کراچی میں این سی اے، نیشنل ٹیکسٹائل یونیورسٹی کے کیمپس بنانے کا بجٹ مانگا ہے، کراچی کی کچی آبادیوں کے آؤٹ آف سکول بچوں کیلئے بجٹ تجویز کیا ہے۔
ممبر کمیٹی نے کہا کہ شہر قائد کراچی میں ایک کمیونٹی کا شیئر نہیں پورے پاکستان کی نمائندگی ہے۔
محی الدین وانی کا کہنا تھا کہ سپیشل ایجوکیشن ابھی وزارتِ تعلیم کو منتقل ہوچکا ، سپیشل ایجوکیشن سینٹرز کی اپ گریڈیشن کا منصوبہ اگلے مالی سال کیلئے تجویز کیا ہے۔