صارفین چیٹ جی پی ٹی سے روزانہ کتنے سوالات پوچھتے ہیں؟

صارفین چیٹ جی پی ٹی سے روزانہ کتنے سوالات پوچھتے ہیں؟حیران کن اور دنگ کر دینے والی تفصیلات سامنے آ گئیں۔
دنیا بھر میں کروڑوںصارفین روزانہ آرٹی فیشل انٹیلی جنس (اے آئی) چیٹ بوٹ چیٹ جی پی ٹی کا استعمال کرتے ہیں،مگر کیا آپ نے کبھی سوچا کہ لوگوں کی جانب سے روزانہ اس اے آئی چیٹ بوٹ سے کتنے سوالات پوچھے جاتے ہیں ؟تو اس کا جواب کافی دنگ کر دینے والا ہے۔
ایک رپورٹ کے مطابق روزانہ چیٹ جی پی ٹی کو ڈھائی ارب سے زیادہ درخواستیں ،سوالات، تصاویر بنانے یا دیگر مواد موصول ہوتا ہے۔صرف امریکا سے ہی لوگ روزانہ 33 کروڑ سے زائد بار چیٹ جی پی ٹی سے کسی نہ کسی وجہ سے رجوع کرتے ہیں۔
ڈیٹا سے عندیہ ملتا ہے کہ چیٹ جی پی ٹی کے صارفین سالانہ اس اے آئی ٹول سے 912 ارب سے زائد درخواستیں کرتے ہیں۔
اوپن اے آئی کے ایک ترجمان نے بھی اس رپورٹ کے اعداد و شمار کی تصدیق کی ہے۔اگرچہ ابھی بھی چیٹ جی پی ٹی گوگل کی سالانہ 5 ہزار ارب سے زائد سرچز سے بہت پیچھے ہے، مگر اس کے استعمال میں اضافے کی شرح ضرور سرچ کمپنی کیلئےالارمنگ ہے۔محض چند ماہ کے دوران چیٹ جی پی ٹی کو ہر ہفتے استعمال کرنیوالے صارفین کی تعداد 30 کروڑ (دسمبر 2024) سے بڑھ کر 50 کروڑ (مارچ 2025) سے زائد ہوگئی تھی۔
یہ اعداد و شمار اس وقت سامنے آئے ہیں جب جولائی کے شروع میں ایک رپورٹ میں بتایا گیا کہ اوپن اے آئی چند ہفتوں میں اے آئی پر مبنی ویب براؤزر جاری کرنے کیلئے تیار ہے۔یہ ویب براؤزر براہ راست گوگل کروم کا مقابلہ کرے گا ،جبکہ گزشتہ دنوں اوپن اے آئی نے چیٹ جی پی ٹی ایجنٹ بھی متعارف کرایا تھا ،جو کمپیوٹر پر صارفین کیلئے مختلف کام کرسکتا ہے۔