عازمین حج کیلئے خوشخبری، جناح انٹرنیشنل ایئرپورٹ روڈ ٹو مکہ میں شامل

پاکستان ٹوڈے: حج پر جانیوالے پاکستانی عازمین کیلئے اہم پیشرفت، جناح ٹرمینل ائیرپورٹ کو روڈ ٹومکہ پراجیکٹ میں شامل کرلیا گیا۔

تفصیلات کے مطابق حج کی ادائیگی کیلئے جانیوالے عازمین کوروڈ ٹومکہ منصوبے کے تحت ماضی کے مقابلے میں بہتر سہولتیں میسر ہوں گی۔ حج پروازوں کے ذریعے روانہ ہونے والے عازمین حج کی امیگریشن سعودی عرب کے بجائے کراچی ائیرپورٹ پرہی ہوں گی۔ سعودی ایوی ایشن کا عملہ عازمین حج کی امیگریشن کے لیے تعینات ہوگا جس کے بعد عازمین کو جدہ اور مدینہ ایئرپورٹ پر امیگریشن کی ضرورت نہیں ہوگی۔

ذرائع سی اے اے کے مطابق روڈ ٹو مکہ منصوبے کے تحت کراچی ایئرپورٹ پر تیاریاں آخری مراحل میں ہیں، سعودی امیگریشن کے لیے سول ایوی ایشن اتھارٹی کی جانب سے دو کاؤنٹرز کے لئے جگہ مختص کردی گئی ہے۔ڈائریکٹرحج کراچی گلزار سومرو کے مطابق پہلی پرواز کراچی سے 9 مئی کو روڈ ٹو مکہ منصوبے کے تحت حجاز مقدس روانہ ہوگی۔

کراچی سے حکومتی سکیم کے تحت 16 ہزار281، سکھر سے 1 ہزار، کوئٹہ سے 2200 عازمین روڈ ٹو مکہ منصوبے کے تحت جناح انٹرنیشنل ایئرپورٹ سے حجاز مقدس روانہ ہوں گے۔کراچی سے جانیوالے عازمین کے سامان کی پلاسٹک ریپنگ کے اخراجات بھی حکومت برداشت کرے گی۔ اس سلسلے میں آج بروز ہفتہ سے کراچی میں عازمین حج کی تربیتی سیشنز کا آغاز ہو گیا ہے۔