عالیہ حمزہ اور صنم جاوید کی رہائی کی اپیل کرتا ہوں: شیخ رشید
![](https://pakistantoday.tv/wp-content/uploads/2024/06/Sheikh-Rasheed-905x400.jpg)
اسلام آباد: عوامی مسلم لیگ کے سربراہ شیخ رشید نے عید کے موقع پرعالیہ حمزہ اور صنم جاوید کی رہائی کی اپیل کردی۔
عدالت میں پیشی کے موقع پر شیخ رشید نے گفتگو کرتے ہوئے کہا کہ صنم جاوید ،عالیہ حمزہ اور ڈاکٹر یاسمین راشد کی رہائی کی اپیل کرتا ہوں، عدالتیں چھوٹی پڑگئی ہیں بے گناہ لوگوں کی تعداد زیادہ ہے، اڈیالہ میں غریب لوگ ہیں اس گرمی میں 500 لوگوں کی پیشی ہوتی ہے۔
سابق وزیر شیخ رشید نے کہا کہ فوج کی عزت ہمیں جان سے زیادہ عزیز ہے، لیکن اس سے کیا پیغام جارہا ہے؟ میری درخواست ہے، اس عید پر عام معافی اور رہائی کی اپیل دی جائے۔
شیخ رشید نے سیاسی پیشگوئی کرتے ہوئے کہا کہ اگلے 45 دن اہم ہیں، لوگ تنگ ہیں ملک میں اب سیاسی فیصلے ہونگے، سرمایہ کار ملک سے باہر جارہے ہیں تو بیرون ملک سے سرمایہ کار کیسے آئیں گے۔
شیخ رشید نے کہا کہ ملک کو تباہی سے بچایا جائے، ملک تباہی کے کنارے کھڑا ہے، حالات اتنے خراب ہوگئےہیں کہ راولپنڈی میں جنازے لوٹے جارہے ہیں۔