عمران خان کی 9مئی ضمانت کی اپیلیں ،عدالت کی اہم ہدایت

سپریم کورٹ نے چیئرمین پی ٹی آئی عمران خان کی 9 مئی کے واقعات سے متعلق ضمانت کی اپیلوں پر سماعت کے دوران فریقین کو ہدایت کی ہے کہ تمام متعلقہ دستاویزات آج ہی عدالت میں جمع کرائی جائیں۔
چیف جسٹس یحییٰ آفریدی کی سربراہی میں تین رکنی بینچ نے کیس کی سماعت کی، جس میں عمران خان کے وکیل سلمان صفدر، اسپیشل پراسیکیوٹر ذوالفقار نقوی اور علیمہ خان عدالت میں پیش ہوئے۔
سماعت کے دوران چیف جسٹس نے ریمارکس دیے کہ آپ نے کچھ دستاویزات جمع کرائے ہیں، لیکن ہمیں انہیں دیکھنے کا موقع نہیں ملا۔ ہم کل ساڑھے 10 بجے تک دستاویزات کا جائزہ لے لیتے ہیں۔جس پر وکیل سلمان صفدر نے وضاحت دی کہ چند عدالتی فیصلوں سے متعلق دستاویزات عدالت میں جمع کرائی گئی ہیں۔
چیف جسٹس نے مزید کہا کہ جس فریق نے بھی کوئی مواد دینا ہے، آج ہی جمع کروا دے تاکہ پراسیکیوشن بھی اس کا جائزہ لے سکے۔
عدالت نے بعد ازاں سماعت کل ساڑھے 11 بجے تک ملتوی کر دی۔