عیدالاضحی پر شہر قائدکراچی کا موسم کیسا رہے گا؟

عیدالاضحی پر شہر قائد کا موسم کیسا رہے گا؟ موسمیاتی تجزئی کار نے پیشگوئی کر دی۔

بڑی عید کے دنوں میں شہرقائدکراچی میں موسم مرطوب رہنے کا امکان ہے۔موسمیاتی تجزیہ کار اویس حیدر نے عیدالاضحی کے دنوں میں موسم کے حوالے سے پیشگوئی کرتے ہوئے کہاہے کہ عید کے دنوں میں دن کے اوقات میں بھی مطلع جزوی ابرآلود رہے گا، جنوب مغرب سے اچھی رفتار سے ہوائیں چلتی رہیں گی۔

اسی دوران صبح اور رات کے اوقات میں سمندری بادل موجود رہیں گے، جبکہ زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنےکا امکان ہے۔ اویس حیدر کے بقول فی الحال کراچی میں بارش کا کوئی امکان نہیں، کراچی میں جون کے آخر یا جولائی کی شروعات میں مون سون کا آغاز ہو سکتا ہے، مون سون کا سلسلہ وقفے وقفے سے اگست کے آخر تک جاری رہنے کا امکان ہے۔

موسمیاتی تجزیہ کار کے مطابق 13 جون اور اس کے بعد صبح اور رات میں بوندا باندی کا امکان ہے، فی الحال شہر میں کوئی ہیٹ ویو کا امکان نہیں، دن کے اوقات میں ہوا میں نمی کا تناسب 50 سے 60 فیصد ،جبکہ رات کے اوقات میں نمی کا تناسب 80 سے 90 فیصد تک پہنچ سکتا ہے۔