عید الفطر کس دن ہوگی؟ سپارکو کی شوال المکرم کے چاند بارے پیشگوئی

اہل وطن کیلئے چھوٹی عید کے حوالے سے بڑی خوشخبری،پاکستان میں عیدالفطر کس دن ہوگی؟ سپیس اینڈ اپسٹریٹ ریسرچ آرگنائزیشن (سپارکو) نے شوال کے چاند کی پیشگوئی کردی۔
پاکستان کے خلائی و فضائی تحقیقاتی ادارے سپارکو کے جاری کردہ سرکاری بیان میں سائنسی تجزیوں، فلکیاتی اور جدید مشاہداتی ڈیٹا کی بنیاد پر شوال 1446 ہجری کے ہلال کی رویت کے حوالے سے پیشگوئی کی گئی ہے۔
سپارکو کےفلکیاتی ماڈلز کے مطابق شوال کا نیا چاند 29 مارچ 2025 کو پاکستان معیاری وقت کے مطابق3 بجکر 58 منٹ پر تشکیل پائے گا، تاہم ہلال کی رویت کا انحصار اہم عوامل جیسے چاند کی عمر، سورج سے زاویائی فاصلہ، غروبِ آفتاب کے وقت بلندی اور ماحولیاتی حالات پر ہوگا۔30 مارچ 2025 (29 رمضان) کے حوالے سے کیے گئے سائنسی تجزیے میں کہا گیا ہے کہ غروبِ آفتاب کے وقت چاند کی عمر تقریباً 27 گھنٹے ہوگی۔ چاند اور سورج کا زاویائی فاصلہ تقریباً 16 ڈگری ہوگا ،جبکہ غروبِ آفتاب کے وقت چاند کی بلندی تقریباً 14 ڈگری اور روشنی 2 فیصد ہوگی۔
رویت ِہلال کے امکان سے متعلق پیشگوئی میں کہا گیا ہے کہ یہ چاند انسانی آنکھ سے آسانی سے نظر آئے گا، تاہم ان سائنسی پیمانوں کو مدنظر رکھتے ہوئے پیشگوئی میں بتایا گیا ہے کہ 30 مارچ 2025 کو پاکستان میں چاند کے نظر آنے کا امکان نہایت روشن ہے، لہٰذا امسال رمضان کے 29 روزے مکمل ہونے کی توقع ہے اور عید الفطر کا پہلا دن 31 مارچ 2025 کو منایا جائے گا۔
دوسری طرف سرکاری بیان میں کہا گیاہے کہ عید الفطر کے موقع پر چاند کی رویت کا فیصلہ رویت ہلال کمیٹی کی ذمہ داری ہے، لہٰذا مرکزی رویت ہلال کمیٹی ملک بھر سے موصول ہونیوالی گواہیوں کا جائزہ لیکر شوال 1446 ہجری کا باقاعدہ اعلان کرے گی۔
ترجمان سپارکو کے مطابق اگرچہ سائنسی ڈیٹا 30 مارچ 2025 کو ہلال کے نظر آنے کی مضبوط تائید کرتا ہے، مگرمرکزی رویت کمیٹی کا حتمی فیصلہ چشم دید گواہیوں اور مشاہدے کے وقت مقامی موسمی حالات پر منحصر ہوگا۔