قومی ایئرلائن پی آئی اے کی لاہور سے باکو کیلئے پروازوں کا شاندارآغاز

ٹریول اینڈ ٹورازم کے حوالے سے اہم پیشرفت، قومی ایئرلائن پی آئی اے کی لاہور سے باکو کیلئے پروازوں کا آغاز ہو گیا۔
پاکستان انٹرنیشنل ائیر لائن کی پہلی پرواز پی کے 159 لاہور سے 174مسافروں کو لیکر روانہ ہوئی۔قومی ایئر لائن پی آئی اے لاہور سے مزید نئی پروازیں شروع کرنے کی بھی منصوبہ بندی کررہی ہے۔ پی آئی اے کی پرواز کی روانگی سے قبل لاہور ایئرپورٹ پر ایک سادہ، مگر باوقار تقریب کا انعقاد کیا گیا، تقریب میں وزیر دفاع خواجہ آصف اورپاکستان میں آذربائیجان کے سفیر خضر فرہاد وف اور وزارت ہوابازی کے اعلیٰ حکام نے خصوصی شرکت کی۔
پی آئی اے کی جانب سے باکو کی پروازوں سے قبل روڈ شو کا انعقاد کیا گیا، جس میں تمام ٹریول ایجنٹس، ٹور آپریٹرز اور سیاحت سے منسلک افراد نے بھر پور شرکت کی۔
ایشیا کا یورپ کہلانے والا آذربائیجان کا شہر باکو دنیا کے ایک بڑے سیاحتی مقام کی حیثیت سے ابھر رہا ہے۔خوبصورت اور ترقی یافتہ شہر باکو اپنے لذیذ کھانوں، مذہبی اور ثقافتی مقامات کی وجہ سے پاکستان سمیت دنیا بھر کے سیاحوں میں خاص شہرت رکھتا ہے۔