مخصوص نشستوں کامعاملہ:وزیراعظم نےاہم فیصلہ کرلیا

سپریم کورٹ کاتحریک انصاف کومخصوص نشستیں دینےکےفیصلےپروزیراعظم شہبازشریف آج سےاتحادی جماعتوں کےساتھ مشاورت کاآغازکرینگے۔
ذرائع کےمطابق حکمران جماعت مسلم لیگ ن نےپہلے پیپلزپارٹی کے رہنماؤں کو اعتماد میں لینے کا فیصلہ کیاہے، پاکستان مسلم لیگ ن اور پیپلزپارٹی کے درمیان مذاکرات آج دوپہر ایوان صدر میں ہوں گے، پاکستان مسلم لیگ ن کے رہنما آج پیپلزپارٹی کی قیادت سے ملاقات کریں گے،صدر آصف علی زرداری بھی مذاکرات میں شریک ہوں گے۔
ذرائع کےمطابق مسلم لیگ ن کی جانب سے نائب وزیراعظم ووزیرخارجہ اسحاق ڈار، وزیرقانون اعظم نذیر تارڑ، عطاءاللہ تارڑ، عرفان قادر ، احمد چیمہ اور سپیکرقومی اسمبلی سردار ایاز صادق مذاکرات میں شریک ہوں گے،اٹارنی جنرل منصور اعوان کیس سے متعلق صدر مملکت آصف علی اور ارکان کو بریف کریں گے۔ پیپلزپارٹی کی جانب سے فاروق ایچ نائیک، شیری رحمان، نئیر بخاری مذاکرات میں شریک ہوں گے۔
ذرائع کےمطابق مسلم لیگ ن کے رہنما پیپلزپارٹی کو پی ٹی آئی پر پابندی اور تین رہنماؤں پر آرٹیکل 6 لگانے کے فیصلے پر اعتماد میں لیں گے۔

واضح رہےکہ سنی اتحادکونسل نےسپریم کورٹ میں مخصوص نشستوں سےمتعلق کیس کی درخواست دائرکی تھی جس پرسپریم کورٹ کےفل کورٹ نےمحفوظ فیصلہ سنایاجس میں سپریم کورٹ نےمخصوص نشستیں تحریک انصاف کودینےکاحکم دیاتھا۔