مریم نوازکی جاپانی ڈیری کمپنی موریناگا کو پنجاب میں سرمایہ کاری کی پیشکش

وزیراعلیٰ پنجاب مریم نواز نے جاپانی ڈیری کمپنی موریناگا کو پنجاب میں سرمایہ کاری کی دعوت دی ہے، تاکہ صوبے میں ڈیری سیکٹر، نوزائیدہ بچوں کی خوراک، بیکری مصنوعات اور برآمدی معیار کے گوشت کی مقامی سطح پر تیاری کو فروغ دیا جا سکے۔
جاپان کےسرکاری دورےکےدوران وزیراعلیٰ پنجاب مریم نوازنے موریناگا کے ہیڈکوارٹر اور پروڈکشن پلانٹ کادورہ کیا،جس دوران اُن کوکمپنی کے تحقیق و ترقی (R&D) شعبے سے متعلق تفصیلی بریفنگ بھی دی گئی۔
وزیراعلیٰ نے کہا کہ پنجاب حکومت، موریناگا کی ڈیری مصنوعات میں مہارت کو صوبے کے لیے ماڈل بنانا چاہتی ہے اور ڈیری انڈسٹری میں سرمایہ کاری کے ہر شعبے میں کمپنی کو مکمل سہولتیں فراہم کرے گی۔
مریم نواز نے بطور ماں اس بات پر زور دیا کہ بچوں کی غذائی ضروریات ان کی ذاتی ترجیح بھی ہیں۔ملاقات کے دوران دونوں فریقین نے جدید جاپانی ٹیکنالوجی، صحت مند مویشیوں کی افزائش اور اعلیٰ معیار کے گوشت کی پیداوار کے لیے باہمی تعاون پر اتفاق کیا۔
وزیراعلیٰ نے بتایا کہ پاکستان دودھ کی پیداوار کے لحاظ سے دنیا کا چوتھا بڑا ملک ہے، جس میں پنجاب کا حصہ 60 فیصد ہے۔ تاہم پنجاب کا ڈیری شعبہ تاحال 80 فیصد غیر سائنسی اور پرانے طریقوں پر انحصار کر رہا ہے، جس کی وجہ سے پیداوار اور معیار متاثر ہو رہے ہیں۔
انہوں نے مزید کہا کہ پنجاب میں زراعت اور لائیو سٹاک سے وابستہ 63 فیصد آبادی کو موریناگا کی شراکت داری سے براہ راست فائدہ پہنچے گا۔ ان کا کہنا تھا کہ پنجاب میں ڈیری ڈویلپمنٹ اور ایڈوانس پروٹین نیٹ ورک قائم کرنا حکومت کی ترجیحات میں شامل ہے۔
وزیراعلیٰ نے یاد دہانی کروائی کہ 2017 میں بھی موریناگا نے وزیراعظم نواز شریف اور اس وقت کے وزیراعلیٰ شہباز شریف کی قیادت میں پنجاب میں سرمایہ کاری کی تھی، اور شیخوپورہ میں کمپنی کی سرمایہ کاری کو پاکستان اور جاپان کے درمیان فلیگ شپ شراکت داری قرار دیا گیا تھا۔
انہوں نے موریناگا کے بزنس ماڈل کو سراہتے ہوئے کہا کہ اس تعاون سے نہ صرف صوبے میں معیاری خوراک کی دستیابی ممکن ہو گی بلکہ پاکستان کی معیشت کو بھی تقویت ملے گی۔