ملکہ ٔ کوہسار میں سیاحت کا عروج: سیاحوں نے نیو مری کا رخ کر لیا

ملکہ ٔ کوہسار میں سیاحت کا عروج،گرمی سے پریشان ملک بھر سے سیاحوں نے موسم گرما کی تعطیلات کا آغاز ہوتے ہی بڑی تعداد میں ملکہ کوہسار مری کا رخ کرلیا۔
مری شہر سے تقریباً 15 کلومیٹر جنوب مشرق میں واقع پتریاٹہ جسے نیو مری بھی پکارا جاتا ہے، ان دنوں سیاحوں کی پسندیدہ سیاحتی مقام بنا ہوا ہے اور ملکی و غیر ملکی سیاحوں کی بڑی تعداد نے یہاں ڈیرے ڈالے ہوئے ہیں۔
نیو مری پتریاٹہ اپنی چیئرلفٹ کے حوالے سے سیاحوں میں بہت مقبول ہے۔ملکہ کوہسار مری کا یہ سیاحتی مقام اپنے فطری حسن اور قدرتی خوبصورتی سے مالا مال نظاروں کی وجہ سے ملکی و غیر ملکی سیاحوں کی توجہ کا مرکز ہے۔
مقامی ذرائع کے مطابق ملک بھر سے ہزاروں سیاح یہاں کے خوبصورت نظاروں اور پتریاٹی چیئر لفٹ سے لطف اندوز ہونے کیلئے یہاں کا رخ کر رہے ہیں۔ پتریاٹہ کی چیئر لفٹ کا شمار دنیا کی جدید ترین چیئر لفٹس میں ہوتا ہے اور اس چیئر لفٹ کا کُل فاصلہ 7 کلومیٹر ہے ۔ گلہرہ گلی سے شروع ہونیوالی اس چیرلفٹ کا سفر اپنے اندر ایک خوبصورت تجربہ اور دلکشی لیے ہوئے ہے۔
یہی وجہ ہے کہ ملکہ کوہسار مری آنیوالے ملکی و غیر ملکی سیاحوں کی بڑی تعداد پتریاٹہ ٹاپ کا رخ ضرور کرتی ہے۔