موسمیاتی بحران کا نیا حل:آلودگی کو ایندھن بنانیوالی ڈیوائس تیار

موسمیاتی بحران کا نیا حل،سائنسدانوں کا اہم کارنامہ، آلودگی کو ایندھن بنانیوالی ڈیوائس تیار، یہ ڈیوائس ہوا سے آلودگی کشید کر کے اس کو کار آمد ایندھن میں بدل سکتی ہے۔
سائنسدانوں نے شمسی توانائی سے چلنے والی ایک ڈیوائس تیار کر لی، جو ہوا سے آلودگی کشید کر کے اس کو کاروں اور طیاروں کے ایندھن میں تبدیل کردیتی ہے۔یونیورسٹی آف کیمبرج کے محققین کی ٹیم نے یہ نیا ری ایکٹر ضیائی تالیف سے متاثر ہو کر بنایا ہے، جس کو ماحول میں موجود کاربن ڈائی آکسائیڈ کو سِن گیس میں بدلنے کیلئے کسی تار یا بیٹری کی ضرورت نہیں ہوتی۔
محققین کے مطابق یہ ری ایکٹر موسمیاتی بحران کیلئے ایک نیا حل پیش کرتے ہوئے کاربن کشید کرنے اور ذخیرہ کرنے کی موجودہ ٹیکنالوجیز (سی ایس ایس) کا متبادل فراہم کرتا ہے۔سی سی ایس کو موسمیاتی تغیر کے اثرات کو کم کرنے یا ختم کرنے کیلئے ایک طریقہ قرار دیا جاتا ہے اور حال ہی میں برطانیہ نے اس ٹیکنالوجی کیلئے 22 ارب پاؤنڈز مختص کیے ہیں۔
موجودہ سی سی ایس طریقہ کار پر بہت زیادہ توانائی کی کھپت کی وجہ سے تنقید کی جاتی ہے، اس کے علاوہ زیر زمین پریشرائزڈ کاربن ڈائی آکسائیڈ کو ذخیرہ کرنے کے حوالے سے تحفظات کا بھی سامنا ہے۔