موسم سرما میں صحرائے تھر سیاحوں کا مرکز بن گیا

موسم سرما میں صحرائے تھر سیاحوں کا مرکز بن گیا۔
مقامی ذرائع کے مطابق موسم سرما میں صحرائے تھر سیاحوں کے لیے ایک بہترین تفریحی مقام بن جاتا ہے۔ سرد راتیں ہوں یا دن، سیاحوں کے لیے تھر کے صحرائی ٹیلے، ننگرپارکر میں واقع قدرتی حسن والے پہاڑ، نمک کی جھیلیں،مقامی ثقافت اور تہذیبی رنگ میں سجی مچ کچہری اور رن آف کَچھ جیسے مناظر انمول بن جاتے ہیں۔
ننگرپارکر سے 8 کلومیٹر دور رن آف کَچھ ایک شاندار تفریحی مقام بن چکا ہے، جہاں تحصیل ننگر پارکر کی انتظامیہ نے صحرائی ثقافت کو اجاگر کرنے کیلئے کیمپنگ کا اہتمام کیا ہے، جس کے باعث ملک بھر سے بڑی تعداد میں یہاں سیاحوں کی آمد کا سلسلہ جاری ہے۔
سیاحوں کا کہنا ہے کہ اگر حکومت صحرا میں خوبصورت مقامات کو مزید بہتر بنانے کے لیے خصوصی اقدامات کرے تو یہاں کی سیاحت میں مزید اضافہ ہو سکتا ہے۔