میٹا کا دنیا کی طویل ترین زیرسمندر کیبل بچھانے کے منصوبے کا اعلان

سائنس اینڈٹیکنالوجی کے شعبےمیں اہم پیشرفت ،میٹا نے دنیا کی طویل ترین زیرسمندر کیبل بچھانے کے منصوبے پر کام کرنے کا اعلان کر دیا۔
منصوبےکا مقصد امریکا، جنوبی افریقا، برازیل اور دیگر خطوں کو ایک دوسرے سے منسلک کرنا ہے۔
معروف سوشل میڈیا کمپنی میٹا کی جانب سے بتایا گیاہے کہ پراجیکٹ واٹر ورتھ کے تحت 50 ہزار کلومیٹر طویل زیرسمندر کیبل لائن کو بچھایا جائے گا۔میٹا کے بقو ل اس زیرسمندر کیبل کی لمبائی زمین کے مجموعی گھیر سے بھی زیادہ ہے۔
میٹا کے مطابق یہ کیبل لائن 24 فائبر پیئر سسٹم پر مبنی ہے، تاکہ صارفین کو بہترین سپیڈ مل سکے، جبکہ آرٹی فیشل انٹیلی جنس پراجیکٹس کو سپورٹ بھی فراہم کی جاسکے۔ یہ پراجیکٹ بہترین اقتصادی تعاون کو فروغ دے گا اور ان خطوں میں ٹیکنالوجی کو پھیلانےکے مواقع فراہم کرے گا۔
میٹا کے مطابق ان کی کمپنی نے گزشتہ دہائی کے دوران متعدد شراکت داروں کے ساتھ ملکر 20 سے زائد زیرسمندر کیبلز لائنز کے منصوبے مکمل کیے ہیں۔ذہن نشین رہے کہ اس وقت دنیا بھر کا 95 فیصد سے زیادہ انٹرنیٹ ٹریفک زیرسمندر کیبلز کے باعث کام کرتا ہے۔ یہی وجہ ہے کہ دنیا کی طویل ترین زیرسمندر کیبل بچھانے کا یہ منصوبہ انتہائی اہمیت کا حامل ہے۔
میٹا کمپنی کے مطابق اس منصوبے کی تکمیل کے بعد واٹر ورتھ ممالک کی اقتصادی ترقی کی رفتار بڑھ جائے گی اور ڈیجیٹل معیشت کو مزیدفروغ ملے گا۔