نبی کریمؐ نےسکھایامظلوم کی مددکرناایمان کاحصہ ہے،صدرمملکت

صدرمملکت آصف علی زرداری نےکہاہےکہ اللہ کے نبی صلی اللہ علیہ وسلم نے ہمیشہ دوسروں کی مدد اور نصرت کا درس دیا۔ آپؐ نے ہمیں سکھایا کہ ظلم کے خلاف آواز اٹھانا اور مظلوم کی مدد کرنا ایمان کا حصہ ہے۔ آج دنیا تقسیم اور ظلم و زیادتی کا شکار ہے۔
جشن میلاد النبیﷺ کے موقع پر قوم کے نام اپنے پیغام میں صدر مملکت آصف علی زرداری نے کہا کہ پوری قوم کو 12 ربیع الاول کے پرمسرت موقع پر مبارکباد پیش کرتا ہوں۔ یہ دن ہر مسلمان کے دل میں عشقِ رسولﷺ کی شمع روشن کرتا ہے۔اللہ تعالیٰ نے اس مہینے میں ہمیں خاتم  النبیین  حضرت محمدﷺ کی ولادت کی صورت میں عظیم نعمت عطا فرمائی۔ آپﷺ رہتی دنیا تک انسانیت کے لیے ہدایت کا سرچشمہ ہیں۔
آصف علی زرداری کامزیدکہناتھاکہ موجودہ چیلنجز کا مقابلہ کرنے کے لیے بحیثیت ِقوم اور امت ِمسلمہ حضورﷺ کے اسوۂ حسنہ کو اپنی زندگی کا حصہ بنانا ہے۔ رسول اللہﷺ نے ارشاد فرمایا کہ بہترین انسان وہ ہے جو دوسروں کو نفع پہنچائے۔ ہمیں نبی اکرمﷺ کے انسانیت سے محبت اور ہمدردی کے پیغام کو عام کرنے کی ضرورت ہے۔
صدرمملکت کااپنےپیغام میں کہناتھاکہ اللہ تعالیٰ نے رسول اللہﷺ کی زندگی کو ہمارے لیے بہترین نمونہ قرار دیا۔ آپؐ کی سیرتِ طیبہ ہمیں ہر شعبۂ زندگی میں رہنمائی فراہم کرتی ہے۔ آپﷺ نے عدل و انصاف پر مبنی معاشرہ قائم کیا۔ اللہ کے نبی صلی اللہ علیہ وسلم نے ہمیشہ دوسروں کی مدد اور نصرت کا درس دیا۔ آپؐ کی زندگی ہر لمحے میں انسانیت کی خدمت کا عملی نمونہ ہے۔ نبی کریمﷺ نے ہمیں سکھایا کہ ظلم کے خلاف آواز اٹھانا اور مظلوم کی مدد کرنا ایمان کا حصہ ہے۔ آج دنیا تقسیم اور ظلم و زیادتی کا شکار ہے۔ ہمیں نبی اکرمﷺ کے پیغام کو پھیلانا ہے جو محبت، رواداری اور انسانی حقوق کا ضامن ہے۔