وزارت مذہبی امورکی پالیسی کامیاب،حج درخواستوں میں ریکارڈاضافہ

وزارت مذہبی امورکی قسطوں میں حج اخراجات کی پالیسی کامیاب ہوگئی،گزشتہ سال کی نسبت حج درخواستوں میں ریکارڈاضافہ ہوگیا۔
دستاویزات کےمطابق حج درخواستیں موصول ہونےکےپہلےدودنوں میں مجموعی طور پر 4774 درخواستیں موصول ہوئیں۔ جبکہ گزشتہ سال پہلے دو دنوں میں 1300 جبکہ ابتدائی دس دنوں میں 13 ہزار درخواستیں موصول ہوئی تھیں۔ ریگولر سرکاری حج اسکیم کے تحت 4734 درخواستیں جمع ہوئیں۔ بینکوں کو اسپانسر شپ اسیکم کے تحت 40 درخواستیں موصول ہوئیں ہیں۔
دستاویز کے مطابق سرکاری اسکیم کے تحت درخواست کے ساتھ 2 لاکھ روپے جمع کئے جارہے ہیں۔ قرعہ اندازی میں نام آنے پر 4 لاکھ، باقی رقم 10 فروری تک جمع کرانا ہوگی۔ سرکاری اسکیم کیلئے حج درخواستیں 3 دسمبر تک جمع کرائی جاسکتی ہیں۔
کوٹے سے زیادہ درخواستیں آنے پر ریگولر اسکیم کی قرعہ اندازی 6 دسمبر کو ہوگی۔ سرکاری کوٹے کی اسپانسر شپ اسکیم پہلے آئیں پہلے پائیں کی بنیاد پر ہے۔ اسپانسر شپ اسکیم کے لئے تمام رقم یکمشت ڈالروں میں جمع کرانا لازم ہے۔
گزشتہ برس حج درخواستیں کم آنے کے باعث درخواستیں جمع کروانے کے لیے دس روز کی توسیع بھی دی گئی تھی۔