وفاقی کابینہ میں پیش کردہ حج پالیسی 2025 کی تفصیلات

وفاقی کابینہ میں پیش کردہ حج پالیسی 2025 کی تفصیلات منظرعام پرآگئیں۔
ذرائع کےمطابق حج پالیسی 2025 کے تحت خواتین کو بغیر محرم حج کرنے کی اجازت ہوگی،خاتون کو بغیر محرم کے حج کی سعادت حاصل کرنے کی مشروط اجازت دینے کا فیصلہ کیاگیاہے۔ خاتون اپنے والد یا شوہر کی اجازت سے بغیر محرم حج کی سعادت حاصل کر سکیں گی،بغیر محرم کے حج پر جانے والی خاتون کو خواتین کے گروپ میں رہنا ہو گا ۔
ذرائع کامزیدکہناہےکہ سرکاری حج پیکج میں1 لاکھ روپے تک اضافے کا تخمینہ ہے،حج پیکج 10 لاکھ 75 ہزار روپے سے 11 لاکھ 75 ہزار روپے تک مقررہے،حج پالیسی 2024 کے تحت سرکاری حج 10 لاکھ 75 ہزار روپے کا پیکج تھا۔ حکومتی سکیم کے تحت کوٹہ میں 20 ہزار کی کٹوتی کر دی گئی ۔پرائیویٹ سکیم کیلئے کوٹہ میں 3 ہزار کا اضافہ کر دیا گیا ۔
ذرائع کےمطابق حج پالیسی 2025 کے تحت حکومتی کوٹہ 5 ہزار پرائیویٹ کوٹہ 30 ہزار مختص ہو گا،دوران حج انتقال کر جانے والے حجاج کا معاوضہ 100 فیصد بڑھا دیا گیا۔ ہارڈ شپ کوٹے میں 100 فیصد کا اضافہ کر دیا گیا ،پرائیویٹ سیکٹر کے واجبات کیلئے حج انشورنس لازمی قراردی گئی ہے۔ حج پالیسی 2025 کے تحت حج ناظم سکیم متعارف کرانے کا فیصلہ کیاگیاہے،حج ناظم سکیم کے تحت’گھر سے گھر تک‘کا پروگرام شروع کیا جائے گا۔ حج پالسی 2025 کے تحت پاکستان کیلئے1لاکھ 79 ہزار 210 کا کوٹہ مختص کیا گیا ہے، حکومت اور پرائیویٹ سیکٹر کیلئے 50 ،50 فیصد کوٹہ مختص کیا گیا ہے۔