ٹرینیں پٹری پر چڑھ گئیں: مالی سال کے ابتدائی 5ماہ میں ریکارڈ آمدن

ریل کے مسافروں کیلئے خوشخبری،ٹرینیں پٹری پر چڑھ گئیں۔ مالی سال کے ابتدائی 5ماہ میں ریلوے کو ریکارڈ آمدن،پاکستان ریلویز نے مالی سال 2024-25 کے ابتدائی 5 ماہ کے دوران 37.5 ارب روپے کی ریکارڈ آمدنی حاصل کر لی۔
ترجمان ریلوے کے مطابق حالیہ آمدنی گزشتہ مالی سال کی اسی مدت کی آمدنی 32.9 ارب روپے کے مقابلے میں 15 فیصد زائد ہے۔خوش آئند بات یہ ہے کہ محکمہ ریلوے کی آمدنی اور ٹرینوں کی تعداد میں اضافہ جبکہ آپریشنل اخراجات میں خاطر خواہ کمی ہوئی ہے۔ ابتدائی 5 ماہ میں ٹرینوں کی تعداد میں اضافے کے باوجود فیول اخراجات میں 13.57 فیصد کمی ہوئی ہے۔
سی ای او ریلویز عامر علی بلوچ کا کہنا ہے کہ بہتر ٹرین آپریشن اور مناسب اقدامات کے باعث گزشتہ دو سال میں ریلوے کی مسلسل بہتر کارکردگی رہی، گزشتہ سال ریلوے کا قائم کردہ آمدنی کا ریکارڈ انشا اللہ اس سال مزید بہتر ہوگا۔
سی ای او ریلوے نے اس عزم کا اعادہ کیا کہ 109 ارب روپے کا حکومتی ہدف بھی پورا کریں گے۔