پاکستانی رفیع: مسعود رانا کو مداحوں سے بچھڑے 30 برس بیت گئے

پاکستانی رفیع،گلوکار مسعود رانا کو مداحوں سے بچھڑے 30 برس بیت گئے۔
9 جون 1938ء کو میرپورخاص کے ایک زمیندار کے گھر میں پیدا ہونےوالے مسعود رانا نے 1962ء میں گلوکاری کا آغاز کیا اور پہلی فلم انقلاب کے لئے پہلا گانا گایا لیکن اُن کواصل شہرت پنجابی فلم ڈاچی سے ملی۔
مسعود رانا نے تین عشروں پر محیط کیریئر کے دوران 500 سے زائد فلموں کے لئے گانے گائے، چند لالی ووڈ فلموں میں بطور اداکار بھی جلوہ گر ہوئے۔وہ اردو اور پنجابی فلموں کے صَف اوّل کے گلوکار تھے۔
ان کے گائے ہوئے گانے اداکار ندیم، محمد علی، وحیدمراد، غلام محی الدین سمیت پاکستان کے تمام بڑے اداکاروں پر فلمبند ہوئے، مسعود رانا نے کئی ملی نغمے بھی گائے، 1965ء اور 1971ء کی جنگ میں گائے ہوئے ان کے جنگی ترانے آج بھی خون کو گرما دیتے ہیں۔
ورسٹائل گلوکار مسعود رانا 4 اکتوبر 1995 کو انتقال کر گئے، تاہم وہ اپنے مداحوں کے دلوں میں آج بھی زندہ ہیں۔ اُنہیں پاکستانی رفیع کا خطاب دیا گیا۔