پاکستان امن کاخواہاں ہے،ملکی سالمیت پرکسی بھی حملےکاسخت جواب دیا جائے گا، فیلڈمارشل

آرمی چیف فیلڈ مارشل سید عاصم منیر نےکہا ہےکہ پاکستان امن کاخواہاں ہے، مگرملکی سالمیت پرکسی بھی حملےکاسخت جواب دیا جائے گا۔
پاک فوج کےشعبہ تعلقات عامہ آئی ایس پی آر کے مطابق فیلڈمارشل سیدعاصم منیرنےجی ایچ کیو میں 17ویں نیشنل ورکشاپ میں بلوچستان کے شرکاء سے ملاقات کی۔
ترجمان پاک فوج کاکہناہےکہ آرمی چیف نے وفاقی اور صوبائی حکومتوں کے ترقیاتی اقدامات پرروشنی ڈالی،فیلڈمارشل نے بلوچستان کے بے پناہ اقتصادی امکانات کو عوام کی بہتری کے لیے بروئے کار لانے پر زور دیا۔
آرمی چیف کا کہنا تھا کہ بلوچستان پاکستان کا فخر ہے، بلوچستان کے لوگ نہایت باصلاحیت، باہمت اور محب وطن ہیں، بلوچستان کے عوام ملک کا حقیقی سرمایہ ہیں۔
آرمی چیف نے نوجوانوں کو قومی دھارے میں شامل کرنے اور بااختیار بنانے میں سول سوسائٹی کے مثبت کردار کو سراہا۔
آرمی چیف کا کہنا تھا کہ پائیدار ترقی کے لیے نوجوانوں کا فعال کردار نہایت اہم ہے، ذاتی سیاسی مفادات پر مبنی ایجنڈوں کو رد کرکے ملکی مفاد کو مقدم رکھنا ہوگا۔
فیلڈ مارشل سید عاصم منیر کا کہنا تھا کہ فتنہ الہند اور فتنہ الخوارج شر انگیزی اور ترقی مخالف بیانیہ پھیلانے کی مذموم کوشش کر رہے ہیں، پاکستان خطے میں امن و استحکام کا خواہاں ہے، کسی بھی براہ راست یا بالواسطہ سرحدی خلاف ورزی کا فیصلہ کن جواب دیا جائےگا۔