پاکستان میں چینی طرز پر ای ٹیکسی سروس شروع کرنے کا فیصلہ

مسافروں اور سیاحوں کیلئے بڑی خوشخبری،پاکستان میں چینی طرز پر ای ٹیکسی سروس شروع کرنے کا فیصلہ، الیکٹرک گاڑیاں فراہم کرنیوالی کمپنیوں کا ای ٹیکسی سکیم میں بھرپور دلچسپی کا اظہار،پنجاب میں پہلی ای ٹیکسی سروس شروع کرنے کا فیصلہ کرلیا گیا۔
لاہور میں وزیر ٹرانسپورٹ پنجاب بلال اکبر خان کی زیر صدارت ٹرانسپورٹ ہاؤس میں ای ٹیکسی پر تجاویز اور مشاورت کیلئے سیمینار منعقد ہوا۔سیمینار میں مختلف سرکاری محکموں، الیکٹرک گاڑیاں بنانیوالی کمپنیوں، ٹرانسپورٹرز اور سٹیک ہولڈرز نے شرکت کی۔
سیمینار میں ای ٹیکسی کیلئے الیکٹرک گاڑیوں کی اقسام، قیمتوں، سروس اور تکنیکی معاملات پر گفتگو کی گئی۔ای ٹیکسی سمیت دیگر الیکٹرک گاڑیوں کیلئےچارجنگ سٹیشنز، بیٹریوں کے معیار اور سپیئر پارٹس کی آسانی سے فراہمی پر مختلف تجاویز پیش کی گئیں۔
وزیر ٹرانسپورٹ بلال اکبر خان کا کہنا تھا کہ بیروزگار افراد کیلئے ای ٹیکسی سکیم لائی جا رہی ہے،اس سکیم میں ایسی گاڑیاں فراہم کی جائیں گی، جو قیمت میں نسبتاً کم، مگر معیار میں بہترین ہوں گی۔ اس سکیم سے عوام میں بیروزگاری میں کمی اور سستی سفری سہولت دستیاب ہو گی۔