پاک سعودیہ حج معاہدہ 2025 طے، عازمین کو کیا سہولیات ملیں گی؟

پاکستانی عازمین حج کیلئے خوشخبری،پاکستان اور سعودیہ کے درمیان حج 2025 کا معاہدہ طے پا گیا۔ عازمین حج کو کیاکیا سہولیات ملیں گی؟تفصیلات سامنے آ گئیں۔
سعودی وزارت حج کے مطابق وفاقی وزیر چودھری سالک اور سعودی وزیرحج ڈاکٹرتوفیق الربیعہ نے معاہدے پردستخط کیے، جس کے تحت ایک لاکھ79 ہزار 210 پاکستانی رواں سال فریضہ حج ادا کریں گے۔
سعودی وزارت حج کے مطابق پاکستانی عازمین حج کو بہتر سے بہتر سہولیات فراہم کرنے پر اتفاق کیا گیا ہے۔معاہدے کے تحت حج کو آسان اورآرام دہ بنانےکیلئے 20 ،25 دن کامختصرحج پروگرام بھی متعارف کرایا گیا ہے،جبکہ پاکستانی حجاج کو منیٰ میں خصوصی جگہ دی جائے گی اور نرخ بھی کم ہوں گے۔
عازمین حج کو مدینہ منورہ میں 4 سے 8 دن کیلئے رہائش کےانتخاب کی سہولت بھی ہوگی، نیز زائرین کو ایک بیگ ملےگا ،جس میں پاکستانی پرچم اور شناخت کیلئے کیوآرکوڈ ہوگا۔
سعودی وزارت حج کے مطابق خصوصی موبائل ایپ پرعازمین حج کو تمام معلومات دستیاب ہوں گی۔