پی آئی اے کا برطانیہ کیلئے فلائٹ آپریشن، ہوٹل سروس کیلئے درخواستیں طلب

فضائی مسافروں کیلئے خوشخبری،پی آئی اے نے برطانیہ کے فلائٹ آپریشن کی منصوبہ بندی تیز کردی۔قومی ایئر لائن کا برطانیہ کیلئے فلائٹ آپریشن اور ہوٹل سروس کیلئے درخواستیں طلب کرلیں۔
ذرائع کےمطابق پی آئی اے نے برطانیہ کیلئے فلائٹ آپریشن کی منصوبہ بندی تیز کر دی ہے اور قومی ائیرلائن کی انتظامیہ نے مانچسٹر میں کپتانوں، انجینئرز اور فضائی میزبانوں کی رہائش کیلئے انتظامات شروع کر دیے ہیں اور ہوٹل سروس کی درخواست طلب کرلی ہیں۔
ذرائع نے بتایا کہ پی آئی اے نے مانچسٹر میں اپنے عملے کیلئے ہوٹل سروسز کیلئے درخواستیں 3 نومبر تک طلب کی ہیں اور دلچپسی رکھنے والوں کو درخواستیں پی آئی اے شعبہ سپلائی چین کے جی ایم پروکیورمنٹ کو ارسال کرنے کا کہا گیا ہے۔
ذہن نشین رہے کہ قومی ائیرلائن کی پروازوں کو کئی سالہ بندش کے بعد گزشتہ ہفتے برطانیہ کیلئے فلائٹ آپریشن کی اجازت ملی ہے۔