چیٹ جی پی ٹی نے ٹاسکس نامی کارآمد فیچرمتعارف کروا دیا

اے آئی صارفین کیلئے اہم خبر، چیٹ جی پی ٹی نے ٹاسکس نامی کارآمد فیچرمتعارف کروا دیا ۔
اوپن اے آئی کی جانب سے چیٹ جی پی ٹی کا ایک نیا فیچر ٹاسکس بیٹا (beta) ورژن میں متعارف کرایا گیا ہے۔اس فیچر سے صارفین اس آرٹی فیشل انٹیلی جنس (اے آئی) چیٹ بوٹ کو کوئی کام ایک بار یا بار بار مستقبل میں مقررہ وقت پر کرنے کی ہدایت کر سکیں گے۔
اب تک چیٹ جی پی ٹی میں کئی ایسے فیچرز موجود نہیں جو اسے بہت زیادہ کارآمد ڈیجیٹل اسسٹنٹ بناسکیں،یہی وجہ ہے کہ ٹاسکس فیچر کو چیٹ جی پی ٹی کا حصہ بنایا جا رہا ہے، تاکہ اس سے گوگل اسسٹنٹ اور Siri جیسے اسسٹنٹس کو ٹکر دی جا سکے۔
چیٹ جی پی ٹی کی انتظامیہ کا کہنا ہے کہ صارفین کے سیٹ کیے گئے ریمائنڈرز چیٹ جی پی ٹی کے ویب ورژن میں پروفائل مینیو میں ٹاسکس پیج پر موجود ہوں گے۔صارفین انہیں وہاں دیکھ کر تبدیل یا ڈیلیٹ بھی کرسکتے ہیں۔ایک وقت میں 10 ٹاسکس شیڈول کرنے کی اجازت ہوگی۔
کمپنی کے مطابق اس فیچر کو آپ ہر صبح موسم کا حال جاننے، حصص کی قیمتوں کو دیکھنے یا کسی غیر ملکی زبان کا ایک نیا لفظ سیکھنے کیلئے بھی استعمال کرسکتے ہیں۔دن بھر کی اے آئی نیوز کی سمری بھی اس کے ذریعے حاصل کی جاسکتی ہے۔
ابتدائی طور پر یہ فیچر چیٹ جی پی ٹی کے ماہانہ فیس ادا کرنے والے صارفین کیلئے متعارف کرایا جا رہا ہے،مگر کمپنی نے وعدہ کیا کہ مستقبل قریب میں یہ فیچر چیٹ جی پی ٹی کو مفت استعمال کرنے والے صارفین کو بھی دستیاب ہوگا۔