کراچی: انٹرمیڈیٹ سال اول کے پرچوں کی سکروٹنی فیس ختم کر دی گئی

طلبا و طالبات کیلئے خوشخبری، انٹرمیڈیٹ سال اول کے پرچوں کی سکروٹنی فیس ختم کر دی گئی۔
اعلیٰ ثانوی تعلیمی بورڈ کراچی نے انٹرمیڈیٹ سال اول کے امتحانات کے نتائج سے غیر مطمئن طلبہ کے لیے سکروٹنی فیس ختم کرنے کا اعلان کر دیا ہے۔ اس فیصلے کا مقصد طلبہ کو سہولت فراہم کرنا ہے تاکہ وہ اپنے پرچوں کی دوبارہ جانچ کرا سکیں۔
بورڈ کی جانب سے یہ سہولت سائنس پری میڈیکل، پری انجینئرنگ، سائنس جنرل، کامرس پرائیویٹ، آرٹس پرائیویٹ اور ہوم اکنامکس گروپس کے طلبہ کے لیے فراہم کی گئی ہے۔ اس کے ساتھ طلبا کے لیے انٹربورڈ کی انکوائری پر اور طالبات کے لیے سہولت مرکز پر خصوصی کاؤنٹرز بھی قائم کیے گئے ہیں تاکہ وہ سکروٹنی فارم آسانی سے جمع کروا سکیں۔
ناظم امتحانات کو سکروٹنی مکمل کرنے کے لیے 30 دن کا وقت دیا گیا ہے۔ طلبہ سکروٹنی فارم انٹر بورڈ کی آفیشل ویب سائٹ سے ڈاؤن لوڈ کر سکتے ہیں۔ اس کے علاوہ انٹرمیڈیٹ سال اول کے 2024 کے نتائج کے حوالے سے طلبہ کی شکایات کے حل کے لیے سینئر اساتذہ پر مشتمل انکوائری کمیٹی بھی تشکیل دے دی گئی ہے۔