یوٹیوب کا ہیک شدہ اکاؤنٹس واپس حاصل کرنے کیلئے ٹول متعارف

یوٹیوب کے صارفین کیلئے بڑی خوشخبری،یوٹیوب انتظامیہ نے ہیک شدہ اکاؤنٹس واپس حاصل کرنے کیلئے ٹول متعارف کروا دیا۔
یوٹیوب نے حال ہی میں ایک نیا اے آئی ٹربل شوٹنگ ٹول متعارف کروایا ہے، جو صارفین کو ہیک ہونیوالے اکاؤنٹس ریکور کرنے میں مدد گار ثابت ہو گا۔ اے آئی چیٹ بوٹ سپورٹ اسسٹنٹ صارفین کیلئے اپنے لاگ اِن کو دوبارہ محفوظ کرنے اور ہیک ہونے کے بعد اپنے اکاؤنٹ کو واپس حاصل کرنے کیلئے ایک گائیڈ کے طور پر کام کرے گا۔
اہل صارفین اس فیچر کی مدد سے یوٹیوب ہیلپ سینٹر میں ٹول تک رسائی حاصل کرسکیں گے۔ آپشن کے انتخاب کے بعد چیٹ بوٹ صارف سے ان کے اور ان کے اکاؤنٹ کے بارے میں سوالات کی ایک سیریز پوچھے گا ،تاکہ ان کے گوگل لاگ اِن کو محفوظ کیا جاسکے اور ہیکر کی طرف سے چینل میں کی گئی کسی بھی تبدیلی کو ختم کیا جاسکے۔
اس کے بعد یہ ٹول صارف کی حوصلہ افزائی کرے گا کہ وہ مستقبل میں ہیک ہونے کے خطرے کو کم کرنے کیلئے اپنے اکاؤنٹ کی سکیورٹی کو مضبوط بنائے۔ نیا ٹول فی الحال صرف انگریزی میں دستیاب ہے اور ٹول کے اندر کچھ مخصوص فیچرز صرف خاص صارفین کو دستیاب ہیں، تاہم گوگل کی ذیلی کمپنی یوٹیوب مستقبل میں اس فیچر کو تمام صارفین کیلئے دستیاب کرنے کا ارادہ رکھتی ہے۔