یہ چینی روبوٹ ہے یا لڑکی؟ دیکھنے والے حیرت زدہ رہ گئے

یہ چینی روبوٹ ہے یا لڑکی؟ دیکھنے والے حیرت زدہ رہ گئے۔چین میں سوشل میڈیا پر ایک ایسی لڑکی کی تصاویر وائرل ہورہی ہیں ،جو دیکھنے میں بالکل روبوٹ جیسی ہے۔
نوجوان چینی لڑکی اپنی منفرد صلاحیتوں کی وجہ سے سوشل میڈیا پر خوب توجہ حاصل کر رہی ہیں۔یہ چینی لڑکی خاص روبوٹک لباس، مشینی حرکات اور بےتاثر چہرے کے ساتھ ایک اینڈرائیڈ کا روپ دھار کر سب کو حیران کر رہی ہے۔
دنیا بھر کی کمپنیاں جہاں اپنے روبوٹس کو انسانی شکل دینے کےلیے اربوں ڈالر کی سرمایہ کاری کر رہی ہیں، وہیں ایک نوجوان چینی لڑکی نے خود کو روبوٹ جیسا ظاہر کرنے کا انوکھا راستہ اختیار کرکے سب کو دنگ کر دیا ہے۔
چینی سوشل میڈیا پر ’’روبوٹ گرل‘‘ کے نام سے مشہور یہ لڑکی پہلی بار گزشتہ برس اگست میں بیجنگ میں ہونیوالی ورلڈ روبوٹ کانفرنس کے دوران توجہ کا مرکز بنی، کیونکہ ایک ہائپر ریئلسٹک ہیومینائیڈ روبوٹ کے ساتھ کھڑے ہو کر اس نے سب کو الجھن میں ڈال دیا کہ ان دونوں میں سے کون انسان ہے اور کون روبوٹ؟اس کے بعد سے چینی لڑکی کافی مشہور ہو گئی اور اب ’’روبوٹ گرل‘‘ کے طور پر جانی جاتی ہے۔
حال ہی میں یہ روبوٹ گرل دوبارہ وائرل ہوئی، جب اس نےاینڈرائیڈ کاسٹیوم پہنے اپنے آبائی گاؤں کا دورہ کیا اور وہاں کے لوگوں کو اپنی سخت مشینی حرکات اور بےتاثر چہرے سے حیرت زدہ کر دیا۔اگرچہ یہ لڑکی اپنے روبوٹک انداز میں اپنا چہرہ بےتاثر رکھنے میں مہارت رکھتی ہیں، تاہم ایک آن لائن ویڈیو میں وہ اپنے کردار سے باہر نکل کراس وقت ہنس پڑی، جب گاؤں کی ایک خاتون نے اس سے کہا کہ اگر وہ غیر شادی شدہ ہے تو وہ اس کیلئے ایک نوجوان لڑکے کا رشتہ ڈھونڈ سکتی ہے، جس پر روبوٹ گرل قہقہہ لگاتی دکھائی دیتی ہے۔