190 ملین پاؤنڈز کیس میں اہم پیش رفت

190 ملین پاؤنڈز کیس میں اہم پیش رفت، سزا کے فیصلے کے دو ماہ بعد بانی پی ٹی آئی عمران خان اوراہلیہ بشریٰ بی بی نے سزا معطلی کی درخواستیں دائرکردیں۔
بانی پی ٹی آئی عمران خان اوراہلیہ بشریٰ بی بی نےبیرسٹرسلمان صفدر کے ذریعے اسلام آبادہائیکورٹ میں درخواستیں دائرکیں۔
درخواست میں مؤقف اختیارکیاگیاکہ نیب نے بدنیتی سے اپنے اختیارات کا غلط استعمال کیا۔نامکمل تفتیش کی بنیاد پر جلد بازی میں سزا سنائی گئی۔نیشنل کرائم ایجنسی سے معاہدے کا متن حاصل نہ کرنا تفتیشی ایجنسی کی ہچکچاہٹ کو واضح کرتا ہے۔
درخواست کےمتن میں کہاگیاکہ این سی اے حکام کو شامل تفتیش بھی نہیں کیا گیا، استغاثہ مکمل شواہد پیش کرنے میں ناکام رہا۔
درخواست میں استدعاکی گئی کہ 17 جنوری کو سنائی جانے والے سزا معطل کر کے ضمانت پر رہائی دی جائے، مرکزی اپیل کے حتمی فیصلے تک فیصلہ اور سزا معطل کئے جائیں، عدالت کو یقینی دہانی کراتے ہیں سزا معطلی کے بعد اپیل کی ہر سماعت میں موجود ہوں گے۔