26نومبراحتجاج کیس:علیمہ خان سمیت 10 ملزمان پر فرد جرم عائد

26نومبراحتجاج کیس میں علیمہ خان سمیت 10 ملزمان پر فرد جرم عائد کردی گئی۔
راولپنڈی کی انسداد دہشت گردی عدالت کے جج امجد علی شاہ نے علیمہ خان کے خلاف 26 نومبر ڈی چوک احتجاج کیس کی سماعت کی۔ علیمہ خان کی جانب سے وکیل فیصل ملک اورپراسیکیوٹر ظہیر شاہ عدالت میں پیش ہوئے۔
علیمہ خان نے آج اینٹی ٹیررزم ایکٹ کی سیکشن 23 کے تحت عدالت کے دائرہ اختیار کو چیلنج کیا تھا۔
علیمہ خان نے فرد جرم پر دستخط کرنے سے انکار کر تےہوئےکہاکہ پہلے میری دفعات چیلنج درخواست پر فیصلہ کیا جائے، جس پر انسداد دہشتگردی عدالت کے جج امجد علی شاہ نے کہا کہ فرد جرم عائد کرتے ہیں اور درخواست بھی سن لیتے ہیں۔
علیمہ خان کی شائع درخواست پر پراسیکیوشن نے دلائل دئیے۔
پراسیکیوٹر ظہیر شاہ کاکہناتھاکہ ملزمہ کی جانب سے عدالت کے دائرہ اختیار کو چیلنج کرنے سے ٹرائل نہیں روکا جاسکتا، مقدمے میں نامزد 9 ملزمان کو سزائیں ہوچکی ہیں،علیمہ خان کی درخواست قابل سماعت نہیں۔
عدالت نے استغاثہ کے 5 گواہان کو بیانات قلمبند کرنے کیلئے 17 اکتوبر کو طلب کرلیا۔جبکہ علیمہ خان کی دائر درخواست پر وکلاء صفائی 17 اکتوبر کو دلائل دینگے۔
بعدازاں عدالت نے مقدمے کی سماعت 17 اکتوبر تک ملتوی کردی۔
یادرہےکہ علیمہ خان سمیت 10 ملزمان کے خلاف 26 نومبر کے احتجاج پر تھانہ صادق آباد میں مقدمہ درج ہے۔