پاکستان اور ایران کا مال بردار آئی ٹی آئی ٹرین بحال کرنے پر اتفاق

ریل پر اب بآسانی آئے جائے گا سامان،پاکستان اور ایران نےمال بردار آئی ٹی آئی ٹرین بحال کرنے کا اعلان کردیا۔
پاکستان اور ایران کے درمیان مال بردار آئی ٹی آئی ،اسلام آباد-تہران-استنبول ٹرین بحال کرنے پر اتفاق ہوگیا ۔پاکستان میں ایرانی سفیر ڈاکٹر رضا امیری مقدم کی وزیر ریلوے محمد حنیف عباسی سے ملاقات کے دوران اہم معاملے پر اتفاق ہو گیا۔
اس موقع پرپاکستان اور ایران کے دوطرفہ تعلقات مزید مضبوط بنانے پر بھی گفتگو ہوئی، فریقین نے دونوں ممالک کے مابین مثبت تعاون اور حمایت پر اظہارِ تشکر کیا۔فریقین نے ITI ٹرین اس سال دوبارہ بحال کرنے پر اتفاق کیا ہے۔ ملاقات کے دوران پاکستان ،ایران تجارت میں اضافے اور باہمی درآمدات و برآمدات بڑھانے پر زور دیا گیا۔
وزیر ریلوے محمد حنیف عباسی نے کہا کہ تجارت میں اضافہ ریلوے ریونیو اور ملکی معیشت کیلئے مفید ہوگا۔ انہوں نے کہا کہ علاقائی روابط کا فروغ اور خطے کو ریلوے کے ذریعے جوڑنا ہماری اولین ترجیح ہے۔
اس موقع پرایرانی سفیر نے وزیر ریلوے کو ایران کے سرکاری دورے کی دعوت بھی دی۔وزیر ریلوے محمد حنیف عباسی کا کہنا تھا کہ ایران میں زیارات کی سعادت حاصل کرنا باعثِ شرف ہوگا،نیز ایرانی ریلوے نظام کا جائزہ لینا بھی ایجنڈا کا اہم حصہ ہوگا۔