سیاحت کا فروغ :اسلام آباد سے نتھیاگلی کیلئے ہیلی کاپٹر سروس کا آغاز

سیاحت کے فروغ کا جدید انداز،وفاقی دارالحکومت اسلام آباد اور نتھیاگلی کے درمیان پہلی لگژری ہیلی کاپٹر سروس کا باضابطہ آغاز ہو گیا۔
نجی کمپنیو ں کی جانب سے متعارف کروائی گئی اس سروس کا مقصد سیاحوں خصوصاً غیر ملکی سیاحوں کو آرام دہ، تیز اور معیاری سفری سہولت فراہم کرنا ہے۔اس سروس کے ذریعے اسلام آباد سے نتھیاگلی کا تقریباً تین گھنٹے کادشوار گزار زمینی سفر اب صرف 20 سے 30 منٹ کی پُرسکون فضائی پرواز میں طے کیا جا سکے گا۔ ہیلی کاپٹر میں ایک وقت میں 6 مسافروں کی گنجائش موجود ہے، جبکہ راؤنڈ ٹرپ ٹکٹ کی قیمت 1ہزار50 ڈالر فی کس مقرر کی گئی ہے۔
سیاح اس سفر کے دوران گلیات کے خوبصورت پہاڑی سلسلوں اور قدرتی مناظر کا فضائی نظارہ بھی کر سکیں گے۔بلاشبہ اس نوعیت کے منصوبے نا صرف پاکستان میں ایڈونچر اور لگژری ٹورازم کو فروغ دیں گے، بلکہ ملکی و غیر ملکی اعلیٰ درجے کے سیاحوں کو بھی راغب کرنے میں اہم کردار ادا کریں گے۔
اس سروس کے آغاز سے شمالی علاقہ جات تک رسائی مزید آسان، تیز اور باوقار ہو گی، جو پاکستان کے سیاحتی شعبے کیلئے ایک خوش آئند پیشرفت ہے۔