پاکستانی طلبا کیلئےخوشخبری: روس میں مفت تعلیم کا موقع ہاتھ آ گیا

پاکستانی طلبا کیلئےخوشخبری، روس میں مفت تعلیم کا موقع،مہنگی تعلیم اور محدود سکالر شپس کے دور میں بیرونِ ملک پڑھنے کا خواب رکھنے والے پاکستانی طلبا کیلئے روس میں مفت اعلیٰ تعلیم حاصل کرنے کا اہم موقع ہاتھ آ گیا۔
پاکستان میں روسی سفارت خانے نے اعلان کیا ہے کہ پیپلز فرینڈشپ یونیورسٹی آف رشیا (RUDN University) کے زیر اہتمام اوپن اولمپیاڈ کی آن لائن رجسٹریشن کا آغاز ہو چکا ہے، جس میں پاکستانی طلبا بھی حصہ لے سکتے ہیں۔ پاکستانی طلبا کیلئے یہ موقع خاص اہمیت رکھتا ہے، خاص طور پر اُن نوجوانوں کیلئے جو بیرونِ ملک معیاری اور نسبتاً کم خرچ تعلیم کے مواقع تلاش کر رہے ہیں۔اس میں ہائی سکول مکمل کرنیوالے طلبا، کالج سے فارغ التحصیل نوجوانوں اور یونیورسٹی کے آخری سال میں زیر تعلیم طلبا شرکت کے اہل ہیں۔
اس اوپن اولمپیاڈ کے ذریعے ان تمام امیدواروں کو اپنی تعلیمی صلاحیتیں آن لائن آزمانے کا موقع دیا جا رہا ہے، جس کی بنیاد پر وہ روس میں اعلیٰ تعلیم کیلئے آگے بڑھ سکتے ہیں۔
روسی سفارت خانے کے مطابق اس تعلیمی مقابلے میں نمایاں کارکردگی دکھانے والے امیدواروں کو روسی حکومت کے تعلیمی کوٹے کے تحت ”آر یو ڈی این یونیورسٹی“ میں مکمل طور پر مفت تعلیم حاصل کرنے کا موقع دیا جائے گا۔ٹیسٹ میں اول آنیوالے طلبا کے تمام تعلیمی اخراجات روسی حکومت برداشت کرے گی، جبکہ دیگر امیدواروں کو فیس میں نمایاں رعایت دی جا سکتی ہے اور دستیاب کوٹے کی صورت میں انہیں بھی مفت تعلیم کا موقع مل سکتا ہے، تاہم داخلے کیلئے امیدواروں کو سب سے پہلے آن لائن رجسٹریشن کرنا ہوگی، اس دوران انہیں اپنا پاسپورٹ، قومی شناختی کارڈ، تعلیمی اسناد، سرٹیفکیٹ اور تعلیمی سال کے نمبرز یا گریڈز اپ لوڈ کرنا ہوں گے۔
ابتدائی مرحلے میں ایک آن لائن ٹیسٹ لیا جائے گا، جس میں کامیاب ہونیوالے امیدواروں کو اگلے مرحلے میں انفرادی انٹرویو کیلئے بلایا جائے گا۔