مظفرآباد میں جوائنٹ عوامی ایکشن کمیٹی کی ہڑتال کے اعلان کے پیش نظر حکومت نے انٹرنیٹ اور موبائل فون سروسز بند کرنے کے احکامات جاری کر دیے ہیں۔
ذرائع کے مطابق آزاد کشمیر میں حکومت اور جوائنٹ عوامی ایکشن کمیٹی کے درمیان مذاکرات میں ڈیڈ لاک برقرار رہنے کے بعد سیکیورٹی خدشات کے باعث یہ فیصلہ کیا گیا ہے۔ موبائل اور انٹرنیٹ سروسز آج رات ساڑھے 11 بجے سے معطل کر دی جائیں گی۔
ذرائع کا کہنا ہے کہ سروسز 12 جون تک بند رکھنے کا امکان ہے۔
یہ اقدامات 9 جون کو جوائنٹ عوامی ایکشن کمیٹی کی جانب سے دی گئی شٹر ڈاؤن اور پہیہ جام ہڑتال کی کال کے پیش نظر کیے جا رہے ہیں۔
عوامی ایکشن کمیٹی کے رہنما شوکت نواز میر نے کہا ہے کہ حکومت اور کمیٹی کے درمیان ہونے والے مذاکرات کسی نتیجے پر نہیں پہنچ سکے، جبکہ حکومتی مؤقف تھا کہ احتجاج کی کال واپس لی جائے۔
انہوں نے مزید کہا کہ مذاکرات میں پیش رفت نہ ہونے کے بعد ہڑتال کی کال برقرار رکھی گئی ہے۔
صورتحال کے پیش نظر انتظامیہ نے امن و امان برقرار رکھنے کے لیے مواصلاتی نظام عارضی طور پر معطل کرنے کا فیصلہ کیا ہے۔
