خیبرپختونخوا: گندم کی پیداوار میں کمی پر قابو پانے کیلئے 3نئی اقسام کے بیج تیار

پاکستان میں زرعی انقلاب برپا، گندم کی پیداوار میں کمی پر قابو پانے کیلئے نئی اقسام کے بیج تیار، خیبرپختونخوا میں گندم کی پیداوار میں مسلسل کمی پر قابو پانے کیلئے پشاور کے زرعی تحقیقاتی ادارے ترناب کے ماہرین نے موسمیاتی تبدیلیوں کے باوجود زیادہ پیداوار دینے والی گندم کے تین اقسام کے نئے بیج تیار کرلیے۔
ماہرین کے مطابق خیبرپختونخوا سالانہ 14 لاکھ ٹن گندم پیدا کرتا ہے، جبکہ اس کی سالانہ کھپت 50 لاکھ ٹن ہے۔ صوبے میں کاشتکاری کا 51 فیصد انحصار بارشوں پر ہے، تاہم گزشتہ پانچ برس کے دوران موسمیاتی تبدیلیوں بالخصوص بارشوں کے نہ ہونے سے زرعی شعبہ بری طرح متاثر ہو رہا ہے۔
نئے بیج تیار کرنیوالے ماہرین الطاف اللہ اور اختر علی کے مطابق گندم کی پیداوار بڑھانے کیلئے زرعی تحقیقاتی ادارے ترناب میں نئے بیج تیار کیے ہیں، نئے بیجوں کی تیاری کے ساتھ کسانوں کو جدید کاشتکاری کی تکنیک کی تربیت بھی دی جا رہی ہے، جس سے کاشتکاروں کو پیداواری اہداف حاصل کرنے میں آسانی ہوگی۔
ماہرین کے مطابق حالیہ برسوں کے دوران خیبرپختونخوا میں موسمیاتی تبدیلیوں، بیچ اور کھادوں کی قیمتوں میں اضافے کے باعث کسانوں نے گندم کی کاشت کم کردی تھی، نئے بیجوں سے جہاں صوبے میں گندم کی پیداوار زیادہ ہوگی، وہیں ان بیجوں میں شامل زنک اور آئرن سے بہت سی بیماریوں پر قابو پانے میں بھی مدد ملے گی۔