طلبا کیلئے خوشخبری :سرکاری میڈیکل کالجز میں داخلے کی پہلی سلیکشن لسٹ جاری

ڈاکٹربننے کے خواہشمندطلبا و طالبات کیلئے خوشخبری،سرکاری میڈیکل کالجز میں داخلے کی پہلی سلیکشن لسٹ جاری،پنجاب کے سرکاری میڈیکل کالجز میں داخلے کی پہلی سلیکشن لسٹ جاری کر دی گئی۔
ایم بی بی ایس کی پہلی سلیکشن لسٹ یونیورسٹی آف ہیلتھ سائنسز (یو ایچ ایس) کی ویب سائٹ پر دستیاب ہے۔سرکاری میڈیکل کالجز کیلئے کم سے کم میرٹ تقریبا 94 فیصد رہا۔کنگ ایڈورڈ میڈیکل کالج لاہور کا میرٹ سب سے زیادہ 96فیصد رہا۔ علامہ اقبال میڈیکل کالج لاہور کا میرٹ 95فیصد، سروسز انسٹیٹیوٹ آف میڈیکل سائنسز لاہور کا 95 فیصد اور نشتر میڈیکل کالج ملتان کا بھی 95 فیصد رہا۔دیگر کالجز کے میرٹ میں راولپنڈی میڈیکل کالج 94 فیصد، امیر الدین میڈیکل کالج لاہور کا میرٹ 94 فیصد اور فاطمہ جناح میڈیکل کالج لاہور کا بھی 94 فیصد رہا۔
پنجاب میڈیکل کالج فیصل آباد اور قائد اعظم میڈیکل کالج بہاولپور کا میرٹ بھی 94.5864 فیصد رہا۔گوجرانوالہ میڈیکل کالج کا میرٹ بھی یہی رہا، جبکہ ساہیوال میڈیکل کالج 94.4909 فیصد رہا۔اسی طرح پنجاب کے دیگر میڈیکل کالجز کا میرٹ چند پوائنٹس کے فرق کیساتھ تقریباً مساوی رہا۔
تمام امیدواروں کیلئے اپنی کالج فیس 23 جنوری تک جمع کروانا لازمی ہے۔ فیس کا چالان یو ایچ ایس ایڈمیشن پورٹل سے ڈاؤن لوڈ کیا جا سکتا ہے۔ سرکاری میڈیکل کالجز کی سالانہ فیس 18 ہزار روپے ہے، جو امیدوار بنک آف پنجاب کے اکاؤنٹ میں آن لائن جمع کروا سکتے ہیں۔ امیدواروں کو فیس جمع کرانے کے بعد متعلقہ میڈیکل کالج میں تحریری طور پر جوائننگ دینا ہوگی۔
یو ایچ ایس کے مطابق فیس جمع کرنے اور جوائن کرنیوالے امیدواروں کو ہی داخلہ دیا جائے گا۔