یوٹیوب صارفین کیلئے خوشخبری،متعدد نئے تجرباتی فیچرز متعارف

یوٹیوب صارفین کیلئے خوشخبری، مقبول ترین ایپلی کیشن میں متعدد نئے تجرباتی فیچرز متعارف، مشہورِ زمانہ ویڈیو سٹریمنگ پلیٹ فارم یوٹیوب نے کئی تجرباتی فیچرز صارفین کیلئے متعارف کروا دیے۔
یہ فیچر فی الحال یوٹیوب پریمیئم ماہانہ فیس والے ماڈل کے صارفین کو دستیاب ہوں گے، تاہم امید ہے کہ مستقبل قریب میں یوٹیوب کے مفت صارفین کیلئے بھی انہیں متعارف کرایا جائے گا۔
نئے متعارف کروائےگئے تجرباتی فیچرز میں یوٹیوب پریمئم کے صارفین اب 256kbps پر میوزک ویڈیوز کی آڈیو سٹریمنگ سے لطف اندوز ہوسکتے ہیں۔
اس کے ساتھ کمپنی کی جانب سے 4 پلے بیک سپیڈ آپشنز بھی متعارف کرائے گئے ہیں، یعنی اب یوٹیوب صارفین کو 2x سپیڈ تک محدود رہنے کی ضرورت نہیں، بلکہ اس سے زیادہ تیز رفتاری سے بھی ویڈیوز دیکھ سکیں گے۔پریمیئم صارفین اب ویڈیو پلے بیک سپیڈ 4x تک بڑھا سکیں گے ،تاکہ ویڈیوز کو بہتر انداز میں دیکھنے کا تجربہ حاصل ہوسکے۔
اسی طرح جمپ آہیڈ فیچر اب پریمیئم صارفین کو ویب ورژن میں بھی دستیاب ہوگا،پہلے یہ فیچر صرف موبائل ایپ تک محدود تھا۔یو ٹیوب کے مصنوعی ذہانت آرٹی فیشل انٹیلی جنس اے آئی ٹیکنالوجی پر مبنی اس فیچر کے ذریعے صارفین ویڈیوز کے بہترین حصوں کو دیکھ سکتے ہیں، تاکہ پوری ویڈیو دیکھنے پر ان کا قیمتی وقت ضائع نہ ہو۔
کمپنی کی جانب سے یوٹیوب میں شارٹس کیلئے پکچر ان پکچر فیچر بھی متعارف کرایا گیا ہے،مگر یہ فیچر فی الحال صرف آئی فونز صارفین کو دستیاب ہوگا۔اسی طرح شارٹس کیلئے سمارٹ ڈاؤن لوڈز فیچر بھی صارفین کو دستیاب ہوگا، جس سے وہ آف لائن رہ کربھی اپنی پسندیدہ شارٹس ویڈیوز دیکھ سکیں گے۔