یوٹیوب کو حقیقی ٹکر دینے کیلئےٹک ٹاک میں بڑی تبدیلی متعارف

یوٹیوب کو حقیقی ٹکر دینے کیلئےٹک ٹاک میں بڑی تبدیلی متعارف،ٹک ٹاک کے صارفین ہو جائیں ہوشیار،ٹک ٹاک اب حقیقی معنوں میں دنیا کی مقبول ترین ویڈیو شیئرنگ سروس یوٹیوب کو براہ راست ٹکر دینے کیلئے تیار ہے۔
معروف ویڈیو شیئرنگ ایپ ٹک ٹاک کی جانب سے ڈیسک ٹاپ پلیٹ فارم کو متعدد نئے فیچرز کے ساتھ ری ڈیزائن کیا جا رہا ہے۔
کمپنی کے مطابق ٹک ٹاک کے ڈیسک ٹاپ ورژن میں متعدد نئے فیچرز کا اضافہ کیا جا رہا ہے، جبکہ نیا ویب لے آؤٹ بھی صارفین کو دستیاب ہوگا۔اس نئے لے آؤٹ میں نیوی گیشن بار کی پوزیشن کو تبدیل کیا گیا ہے ،تاکہ ویڈیوز دیکھنے کا تجربہ ٹک ٹاک کے موبائل ورژن کی طرح بہترین ہوسکے۔ٹک ٹاک کے ڈیسک ٹاپ ورژن میں اب صارفین پورٹریٹ یا لینڈ سکیپ موڈ میں گیم لائیو سٹریمز کر سکیں گے اور اس فیچر کا مقصد گیمز سٹریمنگ کے شعبے میں یوٹیوب کی بالادستی کو ٹکر دینا ہے۔
ٹک ٹاک کی جانب سے ایک نیا کلیکشنز فیچر بھی متعارف کرایا جا رہا ہے، جس کے ذریعے صارفین اپنی پسندیدہ ویڈیوز کو مختلف کیٹیگریز میں آرگنائز کرسکیں گے۔اس فیچر کا مقصد سیو کی گئی ویڈیوز کو آسانی سے ڈھونڈنے میں مدد فراہم کرنا ہے۔یہ فیچر بنیادی طور پر یوٹیوب کی پلے لسٹ فیچر سے ملتا جلتا ہے، جس میں مختلف فولڈز میں ویڈیوز کو سیو کرکے بعد میں کسی بھی وقت دیکھا جاتا ہے۔
کمپنی کے مطابق ٹک ٹاک کے ڈیسک ٹاپ صارفین اب گوگل کروم میں فلوٹنگ پلیئر تک بھی رسائی حاصل کرسکیں گے،یعنی ٹک ٹاک ویڈیوز کو دیکھتے ہوئے صارفین کیلئے دیگر کام کرنا بھی ممکن ہو جائے گا۔
ٹک ٹاک کی جانب سے ایپ کے ایکسپلور پیج کو بھی ڈیسک ٹاپ ورژن میں شامل کیا جا رہا ہے، یعنی ایک طرح سے موبائل ڈیوائسز میں جس طرح کے فار یو پیج کا تجربہ صارفین کو ہوتا ہے، وہ اب ویب پر بھی دستیاب ہوگا۔